Երևանում սեպտեմբերի 30-ից հոկտեմբերի 1-ը կանցկացվի Եվրասիական տնտեսական համաժողովը։
Այս մասին հայտնել է Եվրասիական տնտեսական հանձնաժողովի մամուլի ծառայությունը՝ նշելով, որ համաժողովը նվիրված է լինելու Եվրասիական տնտեսական միության տասնամյա գործունեության արդյունքներին, զարգացման հեռանկարներին ու առաջնահերթություններին։
«Համաժողովի նպատակն է բարելավել համագործակցության կապերը Եվրասիական տարածքում:
Նախատեսվում է, որ դրան կմասնակցեն խոշոր, միջին և փոքր բիզնեսի ղեկավարներ, Միության երկրների պետական մարմինների, ինչպես նաև՝ երրորդ երկրների ղեկավարներ, միջազգային կազմակերպությունների ներկայացուցիչներ, որոնք հետաքրքրված են ԵԱՏՄ-ի հետ փոխգործակցությունը զարգացնելու հարցում»,- նշել են մամուլի ծառայությունից։
Բացի այդ, հաղորդվում է նաև, որ համաժողովի ծրագիրը ներառում է ավելի քան 30 միջոցառում, այդ թվում՝ ԵԱՏՄ կառավարությունների ղեկավարների մասնակցությամբ լիագումար նիստ՝ «Թվայնացումը ժամանակակից իրողություններում՝ չորս ազատությունների ապահովման հրամայականը» խորագրով։
Աղբյուրի համաձայն՝ քննարկումների ընթացքում անդամ երկրների և երրորդ երկրների փորձագետները կքննարկեն Միության ռազմավարական զարգացման նոր ուղղությունները։
Եվրասիական տնտեսական ֆորումը Միության ամենամյա գործարար միջոցառում է տնտեսական ոլորտում։ Այն անցկացվում է միության մարմինները նախագահող ԵԱՏՄ երկրներից մեկի ընթացակարգով։ 2024 թվականին Հայաստանը նախագահում է ԵԱՏՄ մարմիններում:
Եվրասիական տնտեսական միությունը միջազգային ինտեգրացիոն տնտեսական միավորում է, որի անդամներն են Բելառուսը, Հայաստանը, Ղազախստանը, Ղրղզստանը և Ռուսաստանը: Դիտող-երկրի կարգավիճակ ունի Մոլդովան:
