Երկրապահ կամավորական միության հիմնադիր անդամ, ԼՂ առաջին պատերազմի մասնակից, «Կոռնիձոր» ջոկատի հրամանատար Արա Խուդավերդյանի խոսքով՝ վերջին օրերին Ադրբեջանի ԶՈՒ ստորաբաժանումների կողմից սահմանագոտու մի շարք ուղղություններով իրականացված սադրանքները հասկանալու համար պետք է մեկ քայլ հետ գնալ:
«Բոլորս սպասում էինք այդ սադրանքներին մինչև ամսի 5-ը, որպեսզի վիժեցվեր ՀՀ վարչապետի, ԱՄՆ պետքարտուղարի և Եվրահանձնաժողովի նախագահի հանդիպումը»,- «Հայկական ժամանակ»-ի հետ զրույցում ասում է նա:
Ըստ Խուդավերդյանի՝ այս գործողությունները Ռուսաստանն է թելադրում. «Ո՞ւմ ձեռք չէր տալիս այդ հանդիպումը… եթե ձեռք տար ՌԴ-ին, ապա վերջինս ակտիվ միջնորդ կլիներ, որպեսզի ժամ առաջ կայանար Հայաստանի հանդիպումը աշխարհի տերերի հետ: Իսկ ՌԴ-ն մինչ ամսի 5-ը տարբեր կալիբրի «պարկապզուկներով»՝ լավրովյան, ադրբեջանական, թուրքական, մեր ներսի շարասյան, բոլորի լեզվով պրովոկացիոն և կեղծ հայտարարություններ էր տարածում, և այդ բոլորը կատարվում էր լավ վճարի դիմաց: Ուզում էին ցույց տալ, որ «мужик сказал, мужик сделал»»:
Նրա խոսքով՝ ռուսական «պառավոզ»-ը՝ «5-րդ շարասյան» կցորդիչով, Ադրբեջանի հետ համատեղ փորձում էր Հայաստանում թե՛ սահմանային, թե՛ ներքաղաքական լարվածություններ առաջացնել:
«Ուզում էին մեծ պրովոկացիաներ ստեղծեին և մեկուսացնեին աշխարհից, որպեսզի իրենց երկաթյա մահակը ջարդեին Հայաստան պետության և հայ ժողովրդի գլխին: Խափանվեց ալիևյան, պուտինյան և 5-րդ շարասյան՝ եռագլխանի հանձնարարականներ ստացածների, որոնք չգիտես՝ հա՞յ են, թե՞ հայատյաց, որոնք «պադպիսկա» էին տվել ռուսական հատուկ ծառայություններին՝ իրականացնելու զինված հեղաշրջման պրոցես ՀՀ-ում: Մենք շատ լավ դուրս եկանք այդ պրոցեսից, կայացավ այն, ինչ կայացավ՝ Հայաստանի ոտնամուտը դեպի Եվրոպա»,- ասում է զրուցակիցը:
Կոռնիձորի Արոն նկատում է, որ Եվրոպա-Ամերիկա-ՌԴ շահերի բախումները բերել են նրան, որ ՀՀ-ն ձեռք է բերել որոշ համախոհներ, որոնք և՛ խոսքով, և՛ գործողություններով աջակցում են. «Իսկ գործընթացները հետագայում ցույց կտան, թե ռազմական ու ռազմաքաղաքական ինչպիսի զարգացումներ կլինեն, ով իր տեղն ում կզիջի, և ինչպիսի նոր էտապ կապրի Հայաստանը»:
Դիտարկմանը, թե ամեն դեպքում Արևմուտքից դեռևս գործուն քայլեր չեն նկատվում Ադրբեջանի վրա ճնշում գործադրելու տեսանկյունից, Խուդավերդյանը նկատում է՝ երեխան էլ անմիջապես չի ծնվում:
«Սկզբում սիրահարվում են, հետո՝ ամուսնանում, հետո՝ հարսանիք, դրանից հետո նոր երեխա է ծնվում: Նույնն էլ այս պարագայում է. Եվրոպան միանգամից մեզ իր գիրկը չէր առնելու, կրծքով կերակրեր, դրանք պրոցեսներ են, և բովանդակային առումով առաջին հանդիպումը խոստումնալից էր, որից հետո արդեն պայմանագրեր կլինեն տարբեր ոլորտներում, և մենք կտեսնենք, թե ինչպիսի շրջադարձ կունենքն»,- ընդգծում է նա:
Խուդավերդյանի խոսքով՝ այս ճանապարհին Ռուսաստանի հրահանգով Ադրբեջանից սադրանքների միշտ պետք է սպասել, դրանք կարող են լինել տարբեր «տրամաչափի» և տևողությամբ, սակայն այս պահին մեծ էսկալացիայի վտանգ չկա. Ադրբեջանն այդ կանաչ լույսը չունի. «Էսկալացիայի հավանականությունը այս պահին շատ քիչ է, բայց քանի որ մենք ունենք թշնամի, որի անունն է Ադրբեջան, ո՛չ պետք է հավատանք Ադրբեջանի «հա»-ին, ո՛չ՝ «չէ»-ին, քանի որ մեր տարածաշրջանում, բացի մեր պետականության, պետության և ժողովրդի շահերից, բախվում են աշխարհի տիրակալների շահերը, մենք պետք է ամեն վայրկյան, ամեն պահի զգոն և զգույշ լինենք բոլոր տիպի ոտնձգություններից Հայաստան պետության և հայ ժողովրդի դեմ: Մենք ռազմաքաղաքական թատերաբեմում ենք և չգիտենք՝ ինչպիսի իրավիճակում, ինչպիսի տեղում և դերում կհայտնվենք»:
Վերջինս նաև նկատում է՝ Ադրբեջանը դե ֆակտո ՀԱՊԿ-ում է, դրա մասին է վկայում Լուկաշենկոյի, միջինասիական պետությունների, ՌԴ-ի ջերմ ազդեցությունը նրանց վրա. «Դրանից առավել դե յուրե բան պետք չէ, «մուսուլմանսկի Կրեմլ» իզուր չեն ասում: Իսկ մեր քայլերը պետք է լինեն հետևյալը՝ հրաժարվել ՀԱՊԿ հասկացությունից, դառնալ հակակշիռ ՀԱՊԿ-ին և ծաղկեցնել սեփական երկիրը: Միայն այս դեպքում Հայաստանը կմաքրվի ռուսական քոձերից, շարասյուներից»:
