Այսօր Կառավարության նիստի ժամանակ քննարկման դրվեց ՀՀ Վայոց ձորի մարզի Ջերմուկ համայնքում 2022 սեպտեմբեր ամսին ռազմական գործողություններից տուժած տնտեսվարողների կոմունալ ծախսերի փոխհատուցման աջակցության ծրագիրը: Այն ներկայացրեց ՀՀ էկոնոմիկայի նախարար Վահան Քերոբյանը:
«2022 թվականի սեպտեմբեր ամսին տեղի ունեցած ռազմական գործողությունները մեծ ազդեցություն են ունեցել Վայոց ձորի Ջերմուկ համայնքում հյուրանոցային և հյուրատնային գործունեություն իրականացնող տնտեսվարողների գործունեության վրա: Ռազմական գործողությունների հետևանքով հյուրանոցներն ու հյուրատները ընդհուպ մինչև երկու ամսով դադարեցրել էին գործունեությունը՝ չընդունելով զբոսաշրջիկների: Չնայած այն հանգամանքին, որ 2022 թվականի հոկտեմբերի կեսերից և նոյեմբերի սկզբից ընդհանուր առմամբ հյուրատների և հյուրանոցների գործունեությունն արդեն վերականգնվել էր, սակայն Ջերմուկ համայնքը շարունակում էր մնալ խնդրահարույց՝ հանգիստը կազմակերպելու տեսանկյունից»,- նկատեց Քերոբյանը:
Վերջինս մանրամասնեց՝ իրենց ունեցած տեղեկատվության համաձայն՝ նախորդ տարվա նույն ժամանակահատվածի համեմատ Ջերմուկ համայնքում երկուսից երեք անգամ նվազել է հյուրանոցային և հյուրատնային գործունեություն իրականացնող տնտեսվարողների իրացման շրջանառությունը. «Խնդիրը ինչ-որ չափով մեղմելու նպատակով հյուրանոցների և հյուրատները որոշակի աշխատանքներ են իրականացրել, մասնավորապես՝ իջեցվել են ծառայությունների գները, ընդհուպ՝ մինչև երկու անգամ, սակայն այս ճանապարհով, այսինքն՝ խնայողությունների հաշվին ծառայությունների գնի իջեցումը, կարող է հանգեցնել տնտեսվարողների մատուցած ծառայությունների որակի վատթարացմանը և, որպես հետևանք, կնպաստի է՛լ ավելի անկմանը, որն ավելի մեծ խնդիրների կհանգեցնի»:
Էկոնոմիկայի նախարարը առաջարկեց Վայոց ձորի մարզի Ջերմուկ համայնքում 2022 թվականի սեպտեմբերի 11-ի դրությամբ հյուրատնային և հյուրանոցային գործունեություն իրականացնող կազմակերպություններին, որոնց շրջանառությունը նվազել է 50 տոկոսից ավելի, փոխհատուցել սեպտեմբերից-դեկտեմբեր ամիսների էլեկտրաէներգիայի և գազի ծախսերի հանրագումարի 100 տոկոսը, որը էապես կթեթևացնի նրանց կրած վնասները և թույլ կտա, որ ընկերությունները ծառայությունները մատուցեն ամբողջ ծավալով և առանց որակի կոմպրոմիսի գնալու:
«Ընդհանուր աջակցության չափը, մեր նախնական գնահատականներով, կկազմի մոտ 50 միլիոն դրամ, որը, կարծում ենք, արդեն կրած վնասների փոխհատուցման տեսանկյունից համարժեք է: Բայց միևնույն ժամանակ Ջերմուկում հյուրանոցային և զբոսաշրջային գործունեության ակտիվացման խնդիրը դեռևս ակտուալ է, և պետք է լրացուցիչ գործողություններ քննարկենք, որպեսզի Ջերմուկում ակտիվացնենք զբոսաշրջային գործունեությունը»,- ասաց Վահան Քերոբյանը:
Վարչապետ Նիկոլ Փաշինյանն էլ ներկայացրեց որոշման նախապատմությունը:
«Նախորդ տարի դեկտեմբերի 17-ին Ջերմուկ քաղաքում տեղի ունեցավ «Քաղաքացիական պայմանագիր» կուսակցության քաղաքական ժողովի նիստը, և այդ ընթացքում մենք շփումներ ունեցանք Ջերմուկի բնակիչների և գործարար շրջանակների հետ և փորձեցինք հասկանալ, թե ինչո՞վ և ինչպե՞ս կարող ենք օգնել Ջերմուկին: Սա առաջարկներից մեկն էր, որ հենց Ջերմուկի գործարար շրջանակներն են արել, և, այո՛, չորս ամսվա գազի և էլեկտրաէներգիայի ծախսը, որը նրանք արդեն վճարել են, մենք հարյուր տոկոսով փոխհատուցելու ենք: Սակայն կա մի նրբություն՝ այդ փոխհատուցում կամ աջակցություն ակնկալող ընկերությունները պետք է 100 հազար դրամից ավելի հարկային պարտավորություն պետության նկատմամբ չունենան, ընդ որում՝ խնդիրը դնում ենք այնպես, որ դիմելու պահին չպետք է ունենան»,- նկատեց վարչապետը:
Որոշումն ընդունվեց, և տնտեսվարողները կարող են արդեն դիմել փոխհատուցում ստանալու համար:
