Նախկին պատգամավոր Անի Սամսոնյանը ֆեյսբուքյան իր էջում գրում է.
«Նախ մենք հարգենք և պաշտպանենք, հետո` ուրիշից պահանջնեք:
Զբոսաշրջային վայրերի պահպանության և պաշտպանության հարցը Հայաստանում չունի համակարգային ուշադրություն և լուծումներ: Պաշտպանության տակ են գտնվում հատուկենտ պատմամշակութային վայրեր և արժեքներ, այն էլ` կիսատ-պռատ:
Հայաստանի տուրիստական իմիջը բարձրացնելու բոլոր ջանքերը զուր են, եթե տարիներ շարունակ զբոսաշրջային վայրերը մնացել են առանց խնամքի, անտեր, ծառայել են որպես անասնագոմ, աղբանոց կամ մարդկանց բնական պահանջմունքները հոգալու վայրեր:
Ակնհայտ է, որ այդպիսի վայրերի պաշտպանության համար մարդկային ռեսուրսներ ներգրավելը կլինի շատ ծախսատար և անարդյունավետ: Բայց կան նաև անվտանգության ապահովման ժամանակակից տեխնիկական միջոցներ, որոնք թույլ կտան պաշտպանել մեր արժեքները և կառույցները:
Անհրաժեշտ է նայել մշակել նոր համապարփակ իրավական կարգավորումներ` զբոսաշրջային վայրերից օգտվելու կանոնները խախտելու դեպքում վարչական պատասխանատվություն սահմանելու համար: Քրեական օրենսգիրքը սահմանում է պատասխանատվություն պատմամշակութային արժեքները փչացնելու կամ վնասելու դեպքում, սակայն դա բավարար չէ:
Եթե համալիր մոտեցում չլինի այս հարցին, մոռացեք Հայաստան զբոսաշրջիկ բերելու մասին»:
