«Արժեքներ կան, որ չեն կարող վաճառքի հանվել.Հիսուսը երբ հարություն առավ՝ սկսեց ապրել մեր սրտերում ու գլխներում, իսկ մենք հիմա մեր սրտից ու գլխից նրան հանում ենք ու կանգնեցնում հուշարձանը».Արմեն Մարտիրոսյան

Արմեն Մարտիրոսյանը ֆեյսբուքյան իր էջում գրել է․

Գագիկ Ծառուկյանը մենք ենք: Նա մեր ժամանակների սիմվոլն է, նկարագիրը, արտահայտչամիջոցը: Ես կասեի՝ Գագիկ Ծառուկյանը մեր հանրության դիագնոզն է՝ մեր արժեքների, մեր գիտելիքի, մեր պահվածքի: Եթե կրթության վիճակը այսպիսին չլիներ՝ Ծառուկյանը Հիսուսի արձան չէր կանգնեցնի:

Հիսուսին սպանեցին 33 թվականին: Մարդկանց պատկերացումներում կամ իսկապես, նա հարություն առավ, «վերածնվեց»: Իսկ մենք 2022-ին նրա հուշարձանն ենք դնում:

Իսկ ե՞րբ ենք մենք մեր թանկ մարդկանց հուշարձանը դնում: Երբ նրանք մահանում են: Հիսուսը երբ հարություն առավ՝ սկսեց ապրել մեր սրտերում ու գլխներում, իսկ մենք հիմա մեր սրտից ու գլխից նրան հանում ենք ու կանգնեցնում հուշարձանը:

Այդ մենք ենք Հիսուսին կրկին սպանում:

Ծառուկյանը ընդամենը մեր ձեռքն է:

Իսկ մեր կառավարությունը գնում է ավելի առաջ՝ մոնետիզացնում է Հիսուսին։

Արժեքներ կան, որ չեն կարող վաճառքի հանվել։

Մենակ մենք չենք այս ճամփան բռնել։ Ժամանակին կաթոլիկ աշխարհը Հիսուսի անունից ինդուլգենցիաներ էր վաճառում։

Այդ պատճառով 1517-ին Մարտին Լյութերը սկիզբ դրեց բողոքականությանը և կատոլիկ եկեղեցուց հեռացան պետություններ ու ժողովուրդներ։

Կաթոլիցիզմը ստիպված եղավ վերափոխվել և ռեֆորմացիային պատասխանեց հակառեֆորմացիայով, երբ Իգնատիուս Լոյոլան ստեղծեց Ճիզվիտների միաբանությունը, որի հիմնական զենքը կրթությունն էր։

Մենք էլ պիտի գնանք այս ճանապարհով։