Սիրելի՛ Նոր Նորքի բնակիչներ, հայրենակիցներ, տեղեկացնում եմ, որ վաղվանից դադարեցնում եմ Նոր Նորք վարչական շրջանի ղեկավարի լիազորություններս։
Այս մասին ֆեյսբույան իր էջում գրել է Նոր Նորքի ղեկավար Սուրեն Ղամբարյանը՝ նշելով, որ պաշտոնավարման ընթացքում սիրով ու նվիրումով է կատարել իր աշխատանքը, ձգտել հնարավոր բոլոր միջոցներով անել ամեն ինչ՝ հարազատ դարձած վարչական շրջանում առկա խնդիրները լուծելու, այն ավելի բարեկարգ և ապրելու պայմաններն առավել հարմարավետ դարձնելու համար։
«Սիրելի հայրենակիցներ, իմ առաջնային նպատակն եմ համարել հարկավոր պահին ձեզնից յուրաքանչյուրի կողքին գտնվելը, աջակցելը, ձեր հոգսերը թեթևացնելը, բոլորիս ջանքերի համատեղմամբ՝ փոխադարձ սիրո և ուշադրության միջավայրի ստեղծումը։
Իմ անկեղծ սերն ու երախտագիտությունն եմ հայտնում բոլորիդ, որ պատրաստակամ և ջանադիր եղաք օր օրի համատեղ շենացնել մեր հարազատ Նոր Նորքը, մեր չքնաղ մայրաքաղաքի՝ ուրույն դիմագծով և կոլորիտով այս շրջանը։
Շնորհակալություն եմ հայտնում բոլոր նրանց, ովքեր ինձ վստահել էին այս պատվաբեր և բարձր պաշտոնը, հնարավորություն տվել ծառայելու ձեզ և վայելելու ձեր հարգանքն ու ջերմ վերաբերմունքը։
Խորին շնորհակալությունս եմ հայտնում վարչական շրջանի բոլոր կրթօջախների աշխատակիցներին, իմ սիրելի աշխատակազմին՝ մեր ջանադիր և արդյունավետ համագործակցության համար ։
Առողջություն և ամենայն բարիք եմ մաղթում բոլորիդ։
Երջանիկ եղեք, սիրելիներս»,-գրել է Սուրեն Ղամբարյանը:
Նշենք, որ Ղամբարյանը Նոր Նորքի ղեկավար է նշանակվել 2021 թվականի օգոստոսի 5-ին, ապա, 2022 թվականի հունվարի 24-ին, վերանշանակվել նույն պաշտոնում։
Մինչ այդ` 2019-2021 թթ., նա աշխատել է որպես ՀՀ վարչապետի օգնական։
