Բաղրամյան 26-ի տեղեկություններով ընդիմության շարքերում լրջագույն տարաձայնություններ կան փողոցային շարժման հետագա ճակատագրի հետ կապված։ Ընդ որում տարաձայնությունները ոչ միայն երկու ճամբարների միջև են, այլ նաև բուն Քոչարյանի և Սարգսյանի ճամբարների ներսում։ Պատգամավորների զգալի մասը փողոցային պայքարը գլխովին ջախջախված է համարվում և առաջարկում է անհապաղ վերադառնալ ԱԺ, որպեսզի գոնե կարողանան մանդատները պահպանել, որովհետև իշխանությունը լրջորեն մտադրված է բացակայությունների հիմքով մանդատից զրկել որոշ պատգամավորների։ Ընդ որում մանդատից զրկելու համար կան բոլոր օրինական հիմքերը և գործիքները ու ամեն ինչ կախված է իշխանության կամքից։
Վերադառնալուն կողմ են թե Քոչարյանի և թե Սարգսյանի խմբակցությունների պատգամավորների մեծ մասը։
Դաշնակների գլխավորությամբ պատգամավորների ավելի փոքր խումբ մտադրված է որևէ պարագայում չվերադառնալ ԱԺ և շարունակել փողոցային պայքարը։ Նրանք այս դիրքորոշումը հիմնավորում են նրանով, որ վերադառնալու դեպքում ընդդիմությունը գլխովին կհեղինակազրկվի և այլևս շանս չի ունենա նույնիսկ 4 տարի հետո ընտրությունների միջոցով ԱԺ մտնել։
Ընդդիմության աղբյուրները հայտնում են, որ երկար վեճերից հետո որոշում է կայացվել շարժվել «և, և» ճանապարհներով։ Այսօրվա հանրահավաքի ընթացքում փողոցային պայքարի կողմնակից ընդդիմության առաջնորդները պատրաստվում են հայտարարել, որ մոտ երկու ամիս տևած պայքարը տվել է կարևոր արդյունքներ, և իրենք լոկալ վրանային պայքարից պատրաստվում են անցում կատարել առավել ընդլայնված պայքարի՝ ընդգրկելով ամբողջ Հայաստանը։ Այս հիմնավորմամբ նրանք կոչ կանեն հանել վրանները Ֆրանսիայի հրապարակից և ազատել երթևեկությունը։
Միևնույն ժամանակ պատգամավորների մյուս խումբը կհիմնավորի, որ ԱԺ-ում կարևոր զարգացումներ են սպասվում, և եթե ընդդիմությունը ներկայացված չլինի այնտեղ, իշխանությունը հնարավորություն կունենա առանց խոչընդոտ օրինագծեր ընդունել ու «հայրենիքը հանձնել թուրքին», ինչին խոչընդոտելու համար իրենք հաջորդ նստաշրջանից կվերադառնան ԱԺ։
