«1988 թվականից իմ մասնակցած ցույցերին ես չեմ հիշում, որ նախաձեռնող կողմը, կազմակերպիչը՝ քաղաքացիական խումբ կլինի, կուսակցություն կլինի, զինվեր քարով, փայտով կամ մուրճով և գնար հարձակման ոստիկանական պատնեշի դեմ, որն ակնհայտորեն պատրաստ էր այդ բախմանը, գոնե այն շարքերը, որոնք վահաններով էին, սաղավարտներով, զրահաբաճկոններով և այլն»,- Civic.am-ի հետ հետ զրույցում, խոսելով հունիսի 3-ին կառավարական ամառանոցի մոտ ընդդիմադիր ցուցարարների և ոստիկանության միջև տեղի ունեցած բախման մասին, ասաց Ժուռնալիստների «Ասպարեզ» ակումբի նախագահ Լևոն Բարսեղյանը։
Նրա խոսքով՝ սա ահագին լուրջ պրոբլեմ է այն քաղաքական ուժերի համար, որոնք համարում են, թե հավաքների ազատության իրավունքը այսպես կարելի է օգտագործել, կամ գոնե համակիրներին չեն բացատրում, որ այս տեսակի գործողությունները խաղաղ հանրահավաքի հետ կապ չունեն, և ովքեր խախտում են այդ գործող օրենսդրությունը, համապատասխան պատասխանատվությանը պատրաստ լինեն։
Խոսելով նաև այն մասին, որ ընդդիմությունը ԵՄ դեսպանատան դիմաց բողոքել էր, որ ոստիկանությունը հատուկ միջոց է կիրառել, իսկ դեսպանատունը լռում է, Լևոն Բարսեղյանն ասաց, որ լավ է, որ ընդդիմությունն առաջին քայլերն է անում՝ սովորելու հանրահավաքային գործողությունները, տեխնոլոգիաները, այդ մշակույթին են սկսում հաղորդակցվել։
Լևոն Բարսեղյանի խոսքով՝ ընդդիմությունն իրավունք ունի նաև դժգոհելու այս կամ այն դեսպանատնից, այս կամ այն պետությունից, գերտերությունից, կարող է գոհ լինել, կարող երջանիկ կամ դժբախտ լինել ինչ-որ պետության դեսպանատան հետ հաղորդակցվելիս։
Ինչ վերաբերում է հատուկ միջոցներ կիրառելուն, Լևոն Բարսեղյանն ասաց, որ երբ մուրճով, քարերով հարձակվում են իրավապահների վրա, իրավապահները, այս դեպքում՝ ոստիկանությունը իրավունք ունի հատուկ միջոցներ կիրառելու, իսկ եթե ընդդիմությունը համարում է, որ նորմալ է, և պիտի թողնեին, որ այդտեղ բոլորի գլուխները ջարդեին, և դա պետք է լիներ հավաքների իրավունքի իրականացում, իրենք խորը մոլորության մեջ են։
«Այս դեպքում էլի երկակի ստանդարտների մասին է խոսակցություն բացվում, բա ինչու չէիք արտահայտվում Մարտի 1-ին, ասենք, հա, մի քանի հոգի դպրոցական էիք, երեխա էիք, էն մյուսներդ այն ժամանակ կամ պաշտոնյա էիք, կամ պաշտոնյաների մերձավոր անձինք էիք։ Արտահայտվե՞լ եք այդ ժամանակ, ի՞նչ եք կարծում։ Մի հատ համեմատեք ձեր այն ժամանակվա հայտարարությունները կամ չարտահայտությունները հիմիկվա ձեր տեսակետի հետ։ Եթե ձեր մեջ նկատում եք փոփոխություններ, որ այն ժամանակ ուրիշ կերպ էիք մտածում, որ կարելի էր Ազատության հրապարակում ոչ մի ճանապարհ չփակած ցուցարարներին առավոտ գիշերով ծեծել, լարել Երևանի փողոցներով մեկ, գիշերն էլ արդեն զրահամեքենաներ ու զորք բերել սահմանից և հարձակվել ցուցարարների վրա, տասը հոգու մահվան պատճառ դառնալ, հազարից ավելի մարդունորմալ էր դա, հիմա համարում եք, որ նորմալ չէ։ Ելեք արտահայտվեք»,- ասաց Լևոն Բարսեղյանը։
Նա նշեց, որ Հայաստանում անհամեմատ ժողովրդավարական միջավայր է, քան թե նախկինում էր։ Ու թեև իր պատկերացրածն ու իր կամեցածը չէ, բայց չի պատկերացնում, որ որևէ մեկը հրապարակի կենտրոնը փակեր ու ամիսներով մնար այնտեղ, ու մեկը չգար ասեր՝ այս դատարկ վրանները ե՞րբ են հավաքելու, ինչո՞ւ է մարդ մահանում նրանց վրանի մեջ։
Լևոն Բարսեղյանի խոսքով՝ կազմակերպիչների գլխավոր խնդիրը ապօրինի գույքի փրկությունն է։
«Չորս տարի իրենք անընդհատ պայքարում են, հենց լինում է ազատազրկման խոսակցություն, կալանքի որոշում, ձերբակալություն, ապօրինի գույք՝ ոտքի են ելնում»,- ասաց Լևոն Բարսեղյանը։
Մանրամասն տեսանյութում
