ԱԺ «Քաղաքացիական պայմանագիր» խմբակցության պատգամավոր Գևորգ Պապոյանը, անդրադառնալով ժամեր առաջ Երևանում տեղի ունեցած իրադարձություններին, ֆեյսբուքյան իր էջում գրել է, որ կատարվածի պատասխանատուն միայն հավաքների կազմակերպիչներն են:
«Իրեն ընդդիմադիր հռչակած ագրեսիվ զանգվածը այսօր իրապես անցավ բոլոր կարմիր գծերը՝ ոստիկանների վրա քարեր ու այլ ծանր առարկաներ նետելով, որի հետևանքով, ըստ տարածվող տեղեկությունների, մի քանի տասնյակ ոստիկան ստացել է տարբեր աստիճանի մարմնական վնասվածքներ։
Իշխանատենչությամբ տարված, սակայն ժողովրդի կողմից համատարած արհամարհանքի արժանացած խմբակը, տեսնելով, որ իրենց ստերին մարդիկ չեն հավատում, և արագ տեմպերով մինչև «քոքը մաշվում» են, այսօր անցավ զանգվածային անկարգությունների կազմակերպման՝ բռնություն կիրառելով ոստիկանների նկատմամբ։ Այս ամենի պատասխանատուն այդ հավաքների կազմակերպիչներն են»,- գրել է Պապոյանը։
Հիշեցնենք՝ խորհրդարանական ընդդիմության այսօր հրավիրած արտահերթ նիստը տեղի չէր ունեցել. իշխող ուժի պատգամավորների բացակայության պատճառով քվորում չէր ապահովվել:
Դրանից հետո ընդդիմադիր պատգամավորները վերադարձել էին Ֆրանսիայի հրապարակ, որտեղ նախատեսված էր հանրահավաք, այնտեղից էլ՝ իրենց համակիրների հետ երթով հասել Կառավարության շենք, այնուհետև՝ Կառավարական առանձնատուն:
Կառավարական առանձնատան դիմաց վերջիններս փորձել էին ճեղքել ոստիկանական շղթան, ինչի հետևանքով ոստիկանների և ցուցարարների միջև բախում էր տեղի ունեցել: Տուժել են և՛ քաղաքացիներ, և՛ ոստիկաններ:
Վերջին տվյալների համաձայն՝ բախումների հետևանքով հիվանդանոցներ է տեղափոխվել 50 անձ, նրանց կեսից ավելին ոստիկաններ են:
