Զանգվածային լրատվության մասին» օրենքի ուժի մեջ մտնելուց հետո պետական կառույցը պարզապես իր հայեցողությամբ կամ որևէ սուր հարցի հիմքով որևէ լրագրողի չի զրկի հավատարմագրումից: Այս մասին խորհրդարանական ճեպազրույցի ժամանակ ասել է ՀՀ ԱԺ «Քաղաքացիական պայմանագիր» խմբակցության պատգամավոր, նախագծի համահեղինակ Արթուր Հովհաննիսյանը։
Պատգամավորը նախ շնորհակալություն է հայտնել այն լրագրողներին, որոնք խնդիր չունեն էթիկայի հետ և բարեխղճորեն կատարում են իրենց պարտականությունները: «Բայց այս օրենքը բացարձակապես կապ չունի էթիկայի հետ: Մենք խոսում ենք պետական մարմիններում աշխատանքային գոտու կանոնների մասին, որոնք էթիկայի կանոններ չեն, որոնք ամրագրված են հավատարմագրման կարգի մեջ: Որևէ հայեցողության մասին խոսք լինել չի կարող: Լրագրողների համար կանխատեսելի է իրենց աշխատանքը պետական մարմիններում, նրանք գիտեն, թե որոնք են աշխատանքային կանոնների խախտումները: Եվ ես բացառում եմ որևէ դեպք, որը կարող է ենթադրել, որ ինչ-որ հայեցողությամբ, ինչ-որ սուր հարցի հիմքով որևէ լրագրողի հավատարմագրման վերաբերյալ բողոք լինի կամ հավատարմագրումը դադարեցվի»,-նշել է Հովհաննիսյանը:
Նրա խոսքով՝ խախտումն արձանագրվելու է, պետական մարմինն այդ խախտման մասին նախազգուշացնելու է լրատվական գործունեություն իրականացնողին, և, եթե մեկ տարվա ընթացքում կրկին խախտում լինի նույն լրագրողի կողմից, և լրատվամիջոցը սեփական դիմումով չփոխարինի լրագրողին, ապա պետական մարմինն ինքը սեփական նախաձեռնությամբ կարող է դադարեցնել տվյալ լրագրողի հավատարմագրումը՝ նրան այլ լրագրողով փոխարինելու հնարավորությամբ: Արթուր Հովհաննիսյանն այդ օրենքում չի տեսնում որևէ իրավունքի սահմանափակում և հայեցողության հնարավորություն:
