Ռուսաստանի դեմ պատժամիջոցները չեն օգնի Եվրոպային հաղթահարել ուկրաինական ճգնաժամը։ Եթե նրանց հիմնական նպատակը հակամարտությունների կանխումն է, ապա ԵՄ-ն պետք է էմբարգո սահմանի ԱՄՆ-ի և Սաուդյան Արաբիայի դեմ, հայտարարել է խորվաթ պատգամավոր Միսլավ Կոլակուշիչը Եվրախորհրդարանի նիստում։
«Եթե դա ճիշտ էր, եթե մենք իսկապես պայքարում էինք խաղաղության համար, ապա մենք պետք է անհապաղ նույն պատժամիջոցները կիրառեինք Սաուդյան Արաբիայի դեմ, որը մի քանի տարի պատերազմ է հրահրում Եմենում: Մենք պետք է արգելեինք նավթի և գազի ներմուծումը ԱՄՆ-ից, որը վերջին տասնամյակների ընթացքում ավելի շատ ռազմական հակամարտությունների մեջ է ներգրավված, քան Եվրոպայի և, հավանաբար, աշխարհի ցանկացած այլ երկիր», – ասել է նա:
Եվրախորհրդարանի պատգամավորը հակառուսական պատժամիջոցներն անվանել է «անհավանական սուտ» և «երեսպաշտություն», սակայն չի հստակեցրել, թե որն է, իր կարծիքով, հակառուսական արգելքների իրական նպատակը։ Մոսկվայի հետ տնտեսական կապերի խզումից առաջինը տուժում են եվրոպացիները, հավելել է Կոլակուշիչը։
Արևմտյան երկրները պատժամիջոցներ են սահմանել Ռուսաստանի դեմ Ուկրաինայի պատճառով։ ԵՄ երկրները, ի թիվս այլ հարցերի, դիտարկում են ռուսական էներգակիրներից հրաժարվելու հնարավորությունը։ ԵՄ պատժամիջոցների վեցերորդ փաթեթը նախատեսում է նավթային էմբարգոյի ներմուծում, սակայն մի շարք պետություններ, մասնավորապես՝ Հունգարիան, արգելափակում են դրա ընդունումը։
Նախագահ Վլադիմիր Պուտինն ընդգծել է, որ Ռուսաստանին զսպելու և թուլացնելու քաղաքականությունը Արևմուտքի համար երկարաժամկետ ռազմավարություն է, և պատժամիջոցները լուրջ հարված են հասցրել ողջ համաշխարհային տնտեսությանը։ Նրա խոսքով՝ ԱՄՆ-ի ու Եվրոպայի գլխավոր նպատակը միլիոնավոր մարդկանց կյանքը վատթարացնելն է։ Նա հավելել է, որ Արևմուտքը փաստացի չի կատարել Ռուսաստանի հանդեպ իր պարտավորությունները՝ սառեցնելով նրա արժութային պահուստները։
