2020 թվականի նոյեմբերի 9-ի լույս 10-ի գիշերը, երբ հայտնի դարձավ, որ արցախա-ադրբեջանական պատերազմի 44-րդ օրը Ռուսաստանի նախագահ Վլադիմիր Պուտինի, Հայաստանի Հանրապետության վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև ստորագրվել է եռակողմ հայտարարություն, որով դադարեցվում են ռազմական գործողությունները, ՀՀ-ում մի խումբ անձինք, ներխուժելով Կառավարության, Ազգային ժողովի շենքեր և ՀՀ վարչապետի կեցավայր, զանգվածային անկարգություններ հրահրեցին:
Ըստ ՀՀ ազգային անվտանգության տարածած հաղորդագրության՝ գործադիր, օրենսդիր մարմինների շենքեր և ՀՀ վարչապետի կեցավայր ներխուժած անձինք դաժան ծեծի էին ենթարկել ՀՀ Ազգային ժողովի այն ժամանակվա նախագահ Արարատ Միրզոյանին, վնասել պետական գույքը, կատարել գողություններ և այլ գործողություններ:
ԱԱԾ հաղորդագրության համաձայն՝ զանգվածային անկարգություններ իրականացրած անձանց նախապես հավաքագրել, դեպքի վայր հանդիսացող շինություններում նրանց ներկայությունը հիմնականում ապահովել էին ընդդիմադիր ուժերի քաղաքական համախոհները, մասնավորապես՝ պարզվել էր, որ այդ անկարգություններին մասնակից անձանց մեջ մեծ թիվ են կազմել Ռոբերտ Քոչարյանի կողմնակիցները, ՀՅԴ անդամ կամ նրանց համախոհ հանդիսացող անձինք, Հայաստանի հանրապետական կուսակցության համախոհները, նախկին պատգամավորների օգնականները և այլք:
Այս ամենին հաջորդեցին արտախորհրդարանական ուժերի՝ վարչապետի հրաժարականի պահանջով ամենօրյա հանրահավաքներն ու ցույցերը, որոնք տևեցին մի քանի ամիս շարունակ:
Եվ չնայած այն հանգամանքին, որ ընդդիմության պայքարն անցնում էր անխոչընդոտ, այնուամենայնիվ, այն այդպես էլ հաջողություն չունեցավ հանրության լայն աջակցության բացակայության պատճառով, իսկ հանգուցալուծումը տրվեց 2021 թվականի հունիսի 20-ին տեղի ունեցած խորհրդարանական արտահերթ ընտրություններով, որի արդյունքներով գործող ուժը շարունակեց երկրի կառավարումը:
Այս ամենից մեկ տարի և արտահերթ ընտրություններից գրեթե 5 ամիս անց «Հայաստան» դաշինքը, որը, ի դեպ, մանդատները վերցնելով՝ ընդունեց ընտրությունների արդյունքներն ու դարձավ ընդիմադիր ամենամեծ խմբակցությունը ԱԺ-ում, հայտարարություն է տարածել, ըստ որի՝ սույն թվականի նոյեմբերի 8-ին՝ ժամը 18:00-ին, քաղաքական թիմի առաջնորդի խոսքով, Երևանի Ազատության հրապարակից համազգային դիմադրություն է սկիզբ առնում:
Երեկ էլ ԱԺ ընդդիմադիր մյուս՝ «Պատիվ ունեմ» խմբակցության ղեկավարն էր լրագրողների հարցին ի պատասխան՝ նշել, որ ներկա են «Հայաստան» դաշինքի կազմակերպած հանրահավաքներին, սակայն որպես մասնակիցներ:
Այսպիսիով՝ այս հայտարարություններից պարզ է դառնում, որ խորհրդարանական ընդդիմությունը կրկին վերսկսում է փողոցային պայքարը: Թե այս անգամ որքա՞ն դա կտևի, պարզ կլինի առաջիկայում:
Քաղաքագետ Լևոն Շիրինյանը, «Հայկական ժամանակի» հետ զրույցում անդրադառնալով դաշինքի հայտարարած համազգային դիմադրության մեկնարկին, այն համեմատեց օգոստոս ամսին սարերից բերված ձյան հետ՝ ընդգծելով՝ «հալվելու է, մաշվի ու գնա»:
«Վազգեն Մանուկյանի նման գոլորշի են դառնալու, հօդս ցնդեն: Նույն ճակատագրին են արժանանալու: Չնայած թող պայքարեն, կերած-խմած մարդիկ են, մի քիչ կնիհարեն»,- նկատեց Շիրինյանը:
Նրա խոսքով՝ եթե նրանք իրենց քայլերով ցանկանում են ինչ-որ բան կանխել, ապա այդ հարցերով պետք է դիմեն ՌԴ-ին. «Իրենք Պուտինին ասելիք ունե՞ն: Մնացածը հակահայ գործեր են: Ովքեր ինչ քայլերի դիմում են ՀՀ-ի ներսում, ՀՀ-ի շահերից չի բխում: Հանրահավաք անում են, որ ի՞նչ անեն. մի քանի օր առաջ է եղել ընտրությունը, ժողովուրդն էլ իր ձայնը տվել է»:
Դիտարկմանը, որ շահարկումներ կան, թե ՀՀ վարչապետը օրեր անց՝ նոյեմբերի 9-ին, իբր թե նոր պայմանագրեր է կնքելու, հարցին՝ ինքը, լինելով այն արտախորհրդարանական ուժերի ներկայացուցիչներից մեկը, որ պարբերաբար հանդիպումներ է ունենում Նիկոլ Փաշինյանի հետ, ի՞նչ կասի այս խոսակցությունների մասին, քաղաքագետը նշեց՝ Նիկոլ Փաշինյանը ոչ մի նոր պայմանագիր չի պատրաստվում ստորագրել. «Թող գնան Կրեմլի պատերի տակ հացադուլ հայտարարեն, մի քիչ էլ կնիհարեն»:
Շիրինյանի կարծիքով՝ ընդդիմության հանրահավաքները ժողովրդի կողմից աջակցություն չեն ստանալու, ինչպես որ աջակցություն չստացան մեկ տարի անց. «Նրանք մի նպատակ ունեն՝ այս հանրահավաքները կազմակերպելով՝ ապակայունացնել ՀՀ ներքին վիճակը: Կերած-խմած մարդիկ են, տունն ունեն, փողն ունեն: Իրենք ավելի լավ է հայտարարեն, թե ՀՀ քաղաքացուց որքան են գողացել և ինչքանն են պատրաստվում վերադարձնել»,- ասաց նա:
Հարցին՝ ընդդիմության ներսում պառակտում նկատո՞ւմ է, օրինակ՝ վերջին շրջանում շատ են խոսակցություններն այն մասին, որ Ռոբերտ Քոչարյանի և Սերժ Սարգսյանի հարաբերություններն այնքան էլ հարթ չեն, թիմերի են բաժանվել, քաղաքագետը նշեց՝ նրանք ընդդիմություն չեն:
«Ռևանշիստներ են, իսկ ռևանշիստները չեն կարող ընդդիմություն լինել: Նրանց նպատակն ամեն գնով իշխանությունը վերադարձնելն է: Իսկ այն ուժերը, որոնք համագործակցում են Քոչարյան-Սարգսյան ռեժիմի հետ, դրանք չեն կարող լինել ընդդիմություն, քանի որ չեն ընդունել ու չեն ընդունում հեղափոխության փաստը»,- նկատեց քաղաքագետը:
Շիրինյանի խոսքով՝ իշխանությունը պետք է ավելի աշխուժանա և ռեֆորմներ իրականացնի երկրում. «Սրանց (ընդդիմության) հարցերը եթե լուծած լինեին, հիմա սրանք (ընդդիմությունը) ի՞նչ գործ ունեին այստեղ: Իշխանությունն ասել էր, որ օլիգարխիան պետք է վերանա: Պետք է իր խոստումը պահի: Եթե մեկը գողացել է, պետք է դրա պատասխանը տա»,- եզրափակեց քաղաքագետը:
Նյութի աղբյուր՝ Հայկական Ժամանակ
