«Հրապարակ» կայքը գրում է․
Այսօր Գյումրու համայնքի նորընտիր ավագանու առաջին նիստն էր, որի ընթացքում քաղաքապետ ընտրվեց «Բալասանյան դաշինքի» թեկնածու Վարդգես Սամսոնյանը։ 33 ավագանու անդամներից նրա օգտին կողմ քվեարկեց 24-ը, դեմ՝ 8-ը:
Լրագրողների հետ կարճ զրույցից հետո Վարդգես Սամսոնյանը հայտարարեց, թե պատրաստվում է եկեղեցի գնալ, մոմ վառել, եւ եթե Շիրակի թեմի առաջնորդ Միքայել սրբազանը քաղաքում լինի, օրհնություն կխնդրի։
Մենք շտապեցինք զրուցել Միքայել արքեպիսկոպոս Աջապահյանի հետ։
-Սրբազան, պատրա՞ստ եք օրհնություն տալու նորընտիր քաղաքապետին, ասաց՝ եկեղեցի է գալու՝ օրհնություն ստանալու։
-Ես քաղաքում եմ, բայց 24 ժամ եկեղեցում չեմ լինում, լինում եմ նաև առաջնորդարանում, ինձ իր այցի մասին տեղյակ չի պահվել, եթե այնտեղ լինեմ ու տեսնեմ․․․
-Ընդունու՞մ եք նրա ընտրվելու փաստը։
-Դե, հիմա ընտրվել է…
-Իսկ այն, որ գյումրեցիների մոտ որոշակի հիասթափություն եղավ, շատերը չէին սպասում, որ ՔՊ-ի հետ կմիավորվի։
-Դե, իրենք են տուժելու, ես մի անգամ ասել եմ՝ եթե միավորվեն, կհեղինակազրկվեն, հիմա մնում է, որ էս 5 տարիների ընթացքում կարողանան հեղինակությունը հետ բերել:
-Դուք ավագանու նիստին ներկա չէիք, նորընտիր ավագանիներն օրհնություն չստացան, հատուկ հրավե՞ր էր պետք։
-Ոչ, դա պարտադիր չէ, իմ ներկայությունը պարտադիր չէ ավագանու առաջին նիստին, բացի այդ, ես ամբողջ Շիրակի մարզի թեմի առաջնորդն եմ, ոչ միայն Գյումրիի։
