Կորոնավիրուսով վարակված Գյումրու քաղաքապետ Սամվել Բալասանյանն ու փոխքաղաքապետ Հայկ Սուլթանյանն իրենց լավ են զգում, ընդունում են բժշկի նշանակած դեղորայքը, հսկողության տակ են: Երկուսն էլ բուժումը շարունակում են ստանալ տնային պայմաններում: Աշխատում են հեռավար:
Այս մասին ՀԺ-ի հետ զրույցում ասաց քաղաքապետի մամուլի քարտուղար Սոնա Առաքելյանը:
Քաղաքապետի վարակվելուց հետո թեստավորված 26 աշխատակիցները, սակայն, մեկուսացված չեն: Չի եղել նման ցուցում, քանի որ, ըստ Առաքելյանի, նրանց թեստերի պատասխանները եղել են բացասական:
«26-ն են թեստավորվել, քանի որ իրենք են եղել սերտ շփման մեջ քաղաքապետի, փոխքաղաքապետի հետ: Հիմնականում աշխատակազմի ներկայացուցիչները, որոնք անմիջական կոնտակտավորներ էին: Բոլորն էլ իրենց լավ են զգում, խնդիրներ չկան: Բացի քաղաքապետից ու փոխքաղաքապետից, մյուսներն աշխատում են տեղում, ամեն օր գալիս են աշխատանքի»,- տեղեկացրեց Առաքելյանը:
Հիշեցնենք, որ Գյումրու քաղաքապետի և փոխքաղաքապետի մոտ վարակը հայտնաբերվել էր սեպտեմբերի 18-ին:
