Գեղարքունիքի մարզի Վարդենիս խոշորացված համայնքի Այրք, Ներքին Շորժա եւ Վերին Շորժա գյուղեր տանող միջհամայնքային ճանապարհները հարթեցվել եւ բարեկարգվել են «ԳեոՊրոՄայնինգ Գոլդ» ընկերության միջոցներով եւ տրամադրած տեխնիկայով:
Ինչպես «Արմենպրես»-ին տեղեկացրեց Վարդենիս համայնքի ղեկավար Արամ Մելքոնյանը, Վարդենիս քաղաքից մինչեւ Վերին Շորժա ձգվող միջհամայնքային ճանապարհի երկարությունը մոտ 16 կիլոմետր է: Ճանապարհը չի հիմնանորոգվել վերջին 5-6 տասնամյակների ընթացքում, և այժմ գրեթե անհնար է դրա շահագործումը: Հողային հարթեցումը եւ բարեկարգումը օգնել է Վարդենիսի հազարից ավելի տնտեսություններին՝ անասնակերն ու հացահատիկի բերքն ավելի անվտանգ տեղափոխելու համար:
«Այս ճանապարհը կենսական կարեւոր նշանակություն ունի մեր համայնքի տնտեսությունների համար, քանի որ այն սպասարկում է անասնապահական ու հողագործական տնտեսությունների մեծ մասին: Դրա շահագործումն օրավուր դառնում էր անհնար, քանի որ չնորոգվելու արդյունքում գրեթե դարձել էր անանցանելի: «ԳեոՊրոՄայնինգ Գոլդ» ընկերության բարի կամքի եւ աջակցության շնորհիվ այժմ արդեն ունենք բավականին բարվոք պատկեր: Նույն կազմակերպության տրամադրած միջոցներով եւ տեխնիկայով այժմ աղբի մշակում եւ հողածածկում ենք իրականացնում Վարդենիս քաղաքի աղբավայրում»,- նշեց համայնքի ղեկավարը:
