Ծեծվե՞լ են, թե՞ մկնդեղ կերել… պատմում են խաշթառակցի երեխաները

Հակոբջանյանների ընտանիքում մեծացող բոլոր 7 երեխաներն էլ Քննչական կոմիտեում հարուցված քրեական գործով ճանաչվել են տուժողներ:

«Ես մկնդեղ չեմ կերել, մենակ Սերգոն ու Նաիրին են կերել, էն փոքրը»: «Չեմ կերել, կարող ա ճաշիս մեջ լցրած լինեն», — ասում են նրանք:

Երեխաները ծեծվե՞լ են, մկնդեղ ե՞ն կերել, թե՞ երկուսը միասին, այս գործով նախաքննությունը դեռ շարունակվում է։ Երեկ ձերբակալվել է խաշթառակցի 28-ամյա Մարիաննան՝ իր հինգ և եղբոր երկու անչափահասներին ձեռքերով, ոտքերով, փայտով պարբերաբար ծեծելու կասկածանքով, մինչև այդ էլ երեխաների պապն էր ձերբակալվել:

Տավուշի մարզի Խաշթառակ համայնքում պատմում էին, որ տան մեծահասակները, տատիկից բացի հոգեկան առողջության ու զարգացման խնդիրներ ունեն, և երեխաները մեծանում են բառացիորեն առանց խնամքի: Յոթ երեխաները բոլորն էլ այժմ երևանյան բուժհաստատություններում են՝ երկուսը` «Սուրբ Աստվածամայր» բուժկենտրոնում, վեցամյա տղայի վիճակը ծայրահեղ ծանր է, ունի բազմաթիվ վնասվածքներ, անգիտակից է, նրա կյանքին վտանգ է սպառնում: Երեխաներից հինգը «Մուրացան» համալսարանական հիվանդանոցում են: Հիվանդանոցի մանկական վերակենդանացման և թունաբանության կլինիկայի ղեկավար Մարինե Գրիգորյանն ասում է. — «Քանի որ առանց ծնողների ուղեկցության են բերվել երեխաները, մենք անամեստիկ տվյալներ չենք ունեցել ի սկզբանե, բայց երեխաների խոսքերով իրենք օգտագործել են մկների համար նախատեսված դեղեր»:

Գրիգորյանի խոսքով` հինգ երեխաներից չորսը էկզոգեն թունավորում ունեն, հակաթույն ստացել են և դեռ պետք է ստանան, քանի որ ենթադրաբար մկնդեղը օրգանիզմում երկար է մնում. — «Արյան մակարդելիությունը խաղտող ազդեցություն, և դրա հետևանքով առաջանում են մարմնի վրա տարբեր հատվածներում, հատկապես շփման տեղերում կապտուկներ»:

տեսանյութը՝ Ազատություն Ռադիոկայանի