Լրագրողներն այսօր Մինսկում ՀՀ ԱԳ նախարարի տեղակալ Շավարշ Քոչարյանի հետ զրույցում հետաքրքրվել են, թե արդյոք Ադրբեջանի սկսած գործողությունները կարող են վերածվել լայնամասշտաբ պատերազմի:
Փոխարտգործնախարարը նշել է.
«Կանխելու համար երկու գործոն կա՝ մեկը, որ իրականացնում է մեր ՊՆ-ն, մեր բանակը, որը ցույց է տալիս, որ այդպիսի մոտեցումները միշտ պատժվելու են, երկրորդը, բնականաբար, դիվանագիտական ասպարեզում է, որտեղ պետք է լինել ակտիվ, որովհետև պարզ է, որ տեղի է ունեցել ագրեսիա»:
SHANTNEWS.am-ի լրագրողը հետաքրքրվել է միջազգային գործընկերների արձագանքով, որին ի պատասխան, փոխնախարարն անդրադարձել է Ադրբեջանի դիրքորոշմանն այն հարցի շուրջ, որ սահմանին անհրաժեշտ է իրականացնել հսկողություն՝ իրավիճակը հստակ պատկերացնելու համար:
«Շատ կարևոր է արձանագրել՝ ով էր, որ հրաժարվում էր, որպեսզի լինեն դիտորդներ, սարքեր, որոնք նմանատիպ իրավիճակներում կարողանան հայտնաբերել՝ ով է սկսել: Դեմ էր Ադրբեջանը և այսօր փորձում է ապացուցել, թե հայկական կողմն է սկսել, հենց այն հանգամանքը, որ միշտ դեմ է եղել, խոսում է նրա մասին, որ ինքը միշտ կողմ է եղել նման քայլերի, էդ տեսակետից որպեսզի միջազգային դիտորդները, միջնորդները, միջազգային կազմակերպությունները կարողանան հենվել ոչ թե կողմերի հայտարարությունների վրա, այլ իրականում տեղի ունեցած փաստերի վրա, դրա համար, իհարկե, անհրաժեշտ է հետևել, ընդհուպ մինչև տիեզերքից, ի վերջո, միջնորդ պետությունները ունեն դրա հնարավորությունը, այդ տեսակետից կարևոր է, որ լինի սահմանի հսկողություն»,- ասել է նա:
Իսկ միջազգային գործընկերները, ըստ նրա, խոսում են՝ հենվելով փաստերի վրա:
«Եթե միայն հայտարարությունների վրա, ապա, բնական է, ամեն կողմ իրենն է հայտարարում, և վաղուց հայտնի է, նա, ով նախաձեռնում է որոշակի արկածախնդրություն, ինքը նախապես պատրաստվում է և ինքն է ներկայացնում՝ իբր ինքն է ենթարկվել հարձակման»:
Ինչ վերաբերում է ՀԱՊԿ-ի արձագանքին, նշել է, որ մենք ՀԱՊԿ-ին օգնության չենք դիմել, կա համապատասխան հոդված, որի համաձայն՝ դիմում ես օգնության:
«Տվյալ պարագայում ՀԱՊԿ-ը ընդամենը կոչ է անում, որ, այո՛, դա կանգնեցվի, հակառակ պարագայում ինքը ստիպված կլինի ներքաշվելու, եթե մենք դիմենք»,- ասել է պաշտոնյան:
