Ադրբեջանական կողմում բարձրաստիճան զինվորականների մահվան հանգամանքը խոսում է ոչ միայն հայկական հարվածի դիպուկության և ուժգնության մասին, այլ նաև այն մասին, որ ադրբեջանցիները մարտական գործողությունների անմիջական գոտի են, այսպես ասած, «գործուղել» բարձրաստիճան հրամկազմ: Դա էլ իր հերթին վկայում է երկու հանգամանքի մասին:
Փաստացի, ադրբեջանական զինուժն ի վիճակի է շատ թե քիչ արդյունավետ մարտական գործողություն վարել միայն այդ մակարդակի անմիջական ընդգրկվածության, ներգրավվածության պայմաններում: Մյուս կողմից, բարձրաստիճան զինվորականների, ընդհուպ գեներալների այդօրինակ «սերտ» ներգրավումը խոսում է այն մասին, որ Ադրբեջանի համար տեղի ունեցածը և արձանագրված կորուստը ունի չափազանց լուրջ նշանակություն, քան պարզապես դիրքային կորուստը:
Միևնույն ժամանակ, դա իր հերթին հասկանալի է՝ դատելով միայն լուսանկարներից, որում պատկերված են դիրքերը, որ ադրբեջանցիները կորցրել են իրենց իսկ սադրիչ գործողությունների հետևանքով: Լուսանկարներն իսկ միանգամայն պարզորոշ ի ցույց են դնում այդ դիրքերի գերակա նշանակությունը ամբողջական լայն հորիզոնով:
