ՀՀ ԱԺ փոխնախագահ Ալեն Սիմոնյանից լրագրողներն այսօր խորհրդարանում հետաքրքրվել են, թե արդյո՞ք «Իմ քայլը» կասկածի տակ չի դնում դատարանի անաչառությունը՝ «Բարգավաճ Հայաստան» խմբակցության ղեկավար Գագիկ Ծառուկյանին չկալանավորելու իրողությունից հետո։
«Դատարանը մեղադրանքը հիմնավոր է ճանաչել: Խափանման միջոցը, իմ ենթադրություններով, կապված է պարոն Ծառուկյանի տարիքի հետ, կորոնավիրուսի առկայության հետ Հայաստանում: Միգուցե դատավորի կողմից դրանք հանդիսացել են ինչ-որ ձևով պատճառներ՝ խափանման միջոցն ընտրել այնպիսի միջոց, որը որ կապված չէ անձին ազատությունից զրկելու հետ: Սրա մասին է պետք խոսել, այս արձանագրումներն անել, որովհետև մեր քաղաքացիներից շատերի մոտ տպավորություն է, որ այն քրեական գործը, որի հետ կապված ԱԺ-ում տեղի ունեցան լսումներ և որոշում, դատարանը բաց թողեց պարոն Ծառուկյանին»,-նշեց Ալեն Սիմոնյանը:
Ինչ վերաբերում է դատական համակարգի անաչառ լինել-չլինելու հանգամանքին՝ ասաց․
«Դատական համակարգի՝ գոյություն ունեցող խնդիրները հայտնի են բոլորին, և մենք բազմիցս դրա մասին խոսել ենք, կարիք չկա ամեն դատական նիստից հետո գնահատական տալ՝ արդեն բոլորին հայտնի փաստի հետ կապված»։
