ՀՀ գլխավոր դատախազությունը վճռաբեկ բողոք կներկայացնի «Մարտի 1»-ի գործով առանցքային ամբաստանյալ Ռոբերտ Քոչարյանին գրավի դիմաց ազատ արձակելու՝ վերաքննիչ քրեական դատարանի դատավոր Արսեն Նիկողոսյանի այսօրվա որոշման դեմ:
«Դատախազությունը բազմիցս է նշել, որ գտնվում ենք դատական քննության այնպիսի փուլում, երբ զգալիորեն մեծ են ամբաստանյալի՝ ազատության մեջ լինելու դեպքում քրեական դատավարությանը մասնակցող անձանց վրա անօրինական ազդեցություն գործադրելու միջոցով գործի քննությանը խոչընդոտելու ռիսկերը, և կալանքից բացի որևէ այլ խափանման միջոց ի զորու չէ չեզոքացնելու ամբաստանյալի պատշաճ վարքագծի ռիսկերը:
Ընդ որում, գործը դատարան մուտք լինելուց հետո մինչ այս պահը դատական քննության փուլ չի փոխվել, և մի քանի անգամ այս հարցի քննարկման արդյունքում ինչպես գործը քննող դատարանը, այնպես էլ նույն վերաքննիչ դատարանը փաստել էին վերը նշված ռիսկի առկայությունը:
Ըստ այդմ, կարող եմ ասել, որ դատական ակտի դեմ դատախազության կողմից կտարվի վճռաբեկ բողոք»,- ասաց ՀՀ գլխավոր դատախազի խորհրդական Գոռ Աբրահամյանը:
