Վրաստանը ՀՀ-ին է նվիրել տեղական արտադրության 4 հազար բարձրորակ բժշկական դիմակներ: Այս մասին ասված է Վրաստանի Գործընկերության հիմնադրամի հաղորդագրության մեջ: Հայաստան ուղարկված դիմակները New Technologie Impex ձեռնարկության արտադրանքն է: Ընկերությունը հիմնադրվել է հիմնադրամի աջակցությամբ:
Ինչպես նշել են կազմակերպությունում, «որպես նշան երկարամյա բարեկամության և համագործակցության», Վրաստանի դեսպանի օգնությամբ դիմակներն ուղարկվել են ՀՀ նախագահին և առողջապահության նախարարին, ինչպես նաև բիզնեսի ներկայացուցիչներին և կառավարական շրջանակների ներկայացուցիչներին:
Աղբյուրի հայտարարությամբ՝ հայկական կողմը շնորհակալություն է հայտնել գործընկերներին օգնության համար:
Հայաստանի պետական շահերի ֆոնդը վրացական արտադրության դիմակները բաժանել է բուժանձնակազմին:
Հիշեցնենք, որ ՀՀ առողջապահության նախարարությունը տեղեկացնում է, որ մայիսի 30-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 8927 դեպք, որոնցից 3317-ն` առողջացած, 127-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 5435 պացիենտ: Ընդհանուր առմամբ կատարվել է 57081 թեստավորում:
Այսպիսով` ունենք կորոնավիրուսային հիվանդությամբ հաստատված 251 նոր դեպք և 20 առողջացած։
Մահվան դեպքերի վերաբերյալ հայտնում ենք, որ պացիենտները եղել են 61 (կին), 82 (տղամարդ), 73 (տղամարդ), 70 (տղամարդ), 75 (տղամարդ), 76 (տղամարդ), 64 (տղամարդ) տարեկան: Բոլորն ունեցել են ուղեկցող քրոնիկական հիվանդություններ:
Նախորդ օրը արձանագրվել է մահվան 3 դեպք, երբ պացիենտի մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 48 է:
