Ազգային ժողովի (ԱԺ) նախագահ Արարատ Միրզոյանն այսօր զգուշացրեց՝ բոլոր այն պատգամավորները, ովքեր խորհրդարանի դահլիճում դիմակ չեն կրի, կնախազգուշացվեն և դահլիճից դուրս կհրավիրվեն։ Այս զգուշացումն, ըստ էության, վերաբերում էր ընդդիմադիր ԲՀԿ պատգամավոր Գևորգ Պետրոսյանին, ով այսօր դահլիճ էր եկել առանց դիմակի։
Նկատենք, միայն վերջերս Ազգային ժողովում հատուկենտ պատգամավորներ էին դիմակներ կրում։ Այսօր, սակայն, խորհրդարանում իրավիճակ էր փոխվել։
«Ես` որպես Ազգային ժողովի նախագահ, նախազգուշացում եմ հայտարարելու, և ապա, եթե անհրաժեշտ լինի, դահլիճից դուրս եմ հրավիրելու մեկ օրով, եթե անհրաժեշտ լինի, ապա 7 օրով, բոլոր այն պատգամավորներին, ովքեր դիմակ չեն կրում»,- հայտարարեց ԱԺ նախագահը:
Արարատ Միրզոյանն ընդունեց` ինքն էլ է սխալ արել, երբ Արցախի նախագահի երդմնակալության արարողության ժամանակ փակ տարածքում դիմակ չի կրել.- «Ուզում եմ բոլորիդ առջև ասել և մեր քաղաքացիների առջև ասել` այո, ես սխալ եմ արել»:
