Կառավարությունը փոփոխություններ և լրացումներ կատարեց գյուղոլորտի աջակցության փաթեթում:
էկոնոմիկայի նախարարը նշեց, որ ֆերմերային գյուղատնտեսական ոլորտի համար հիմնական վարկային գործիքը 3-15 մլն դրամի ֆինանսական աջակցությունն է: Եվ այս որոշմամբ՝ եթե այդ միջոցները պետք է օգտագործվեն տավարաբուծության նպատակով, ապա առավելագույն 15 մլն դրամ սահմանաչափի փոխարեն կիրառվելու է 50 մլն դրամ սահմանաչափ, այսինքն՝ երեք անգամ ավելի:
Տիգրան Խաչատրյանի խոսքով՝ ոչխարաբուծության դեպքում առաջարկվում է սահմանել 30 մլն դրամ սահմանաչափ: Նա նշեց, որ հարևան շուկաներում ոչխարի նկատմամբ պահանջարկը շարունակում է մնալ բարձր, և ֆերմերային տնտեսությունները կարող են օգտվեն այդ հնարավորությունից:
Նախարարը նշեց, որ հաջորդ փոփոխությամբ պետությունը կհամաֆինանսավորի այն ֆերմերներին, որոնք կօգտվեն լիզինգի գործիքից: Պետության համաֆինանսավորումը կկազմի 10 տոկոս:
Տ.Խաչատրյանն ասաց, որ այն ֆերմերները, որոնք ավանդական ծիրանի, դեղձի կամ թզի այգի են տնկում, կվարկավորվեն մինչև 30 մլն դրամ, մայր գումարի վերադարձը նախատեսվում է 4 տարի հետո միայն:
Ըստ նախարարի՝ տոհմային անասնաբուծությամբ զբաղվող ֆերմերային տնտեսությունները, որոնք ունեն խելացի անասնաշենքեր, իրավունք կունենան օգտվել Կառավարության 30 տոկոս համաֆինանսավորումից:
Նա նշեց, որ գյուղատնտեսական կոոպերատիվներն այսուհետ կարող են օգտվել աջակցության ծրագրից՝ չներկայացնելով անցյալ հարկային և վարկային պատմության ապացույց:
«Մենք խնդրել էինք, որ մարզպետներն արձագանքներ հավաքեն գյուղատնտեսական ծրագրերի վերաբերյալ, և մենք քննարկեցինք և գործնականում այդ առաջարկների 90 տոկոսն ընդունեցինք՝ դարձնելով որոշում: Հուսով եմ, որ մեր գյուղատնտեսությունների համար սա լուրջ ազդակ կլինի:
Մենք նաև նպատակ ունենք տնկարանային տնտեսությունները զարգացնել: Կա տնկիների որակի սերտիֆիկացման հարց, այսինքն՝ քաղաքացիները տնկի են առնում, բայց մի քանի տարի հետո արձանագրում են, որ այն չունի այն որակը, որը պետք է ունենա: Մենք կունենանք տնկիների որակի սերտիֆիկացում»,- ընդգծեց վարչապետ Նիկոլ Փաշինյանը:
