Ռուս հայտնի լրագրող, հեռուստահաղորդավար Վլադիմիր Սոլովյովն այսօր՝ Հայոց ցեղասպանության զոհերի հիշատակի 105-րդ տարելիցի օրը, հրապարակել է անմոռուկի լուսանկարը՝ որպես այդ ողբերգական իրադարձությունների գլխավոր խորհրդանիշ եւ մակագրել.
«Օսմանյան կայսրությունում Հայոց ցեղասպանության 105-րդ տարին է։ Հանցագործություն՝ առանց վաղեմության ժամկետի»,- նկարին կից գրել է Սոլովյովը:
Հիշեցնենք՝ հեռուստահաղորդավարը բազմիցս է խոսել Հայոց ցեղասպանության ճանաչման անհրաժեշտության եւ հայտարարել Հայաստանի նկատմամբ իր սիրո, հայերի նկատմամբ՝ հարգանքի մասին:
Հիշեցնենք, որ այսօր ապրիլի 24-ն է, Հայոց ցեղասպանության զոհերի հիշատակի օրը։
Ամեն տարի ապրիլի 24-ին Ծիծեռնակաբերդ այցելությամբ և անմար կրակի մոտ ծաղիկներ խոնարհելով ոգեկոչել ենք Հայոց ցեղասպանության սրբադասված նահատակների հիշատակը: Սակայն այս տարի ավանդական երթը չի կայանա. Մեծ եղեռնի 105-րդ տարելիցի միջոցառումները կանցկացվեն հեռահար՝ հաշվի առնելով արտակարգ իրավիճակով պայմանավորված առողջապահական սահմանափակումները։ Հայաստանի կառավարությունը հանդես է եկել նախաձեռնությամբ, որը Ծիծեռնակաբերդի հուշահամալիրում խորհրդանշական ներկայության հնարավորություն կտա:
Քաղաքացիները կարող են հաղորդագրություն ուղարկել 1915 կարճ համարին Հայաստանից, և 0037433191500 համարին՝ արտասահմանից։ Հաղորդագրություն ուղարկած քաղաքացիների անունները կարտացոլվեն հուշահամալիրի սյուներին` այդպիսով ազդարարելով իրենց խորհրդանշական մասնակցությունը և հարգանքի տուրքը Սուրբ նահատակների հիշատակին։
