Տարեսկզբին «Էրեբունի պլազա» բիզնես կենտրոնում կրակոցներ արձակած Արթուր Թորոսյանը ճանաչվել է անմեղսունակ եւ տեղափոխվել «Նուբարաշենի» հոգեկան առողջության կենտրոն։ Այս մասին «Հրապարակ»-ի հետ զրույցում ասաց նրա պաշտպան Էդուարդ Աղաջանյանը։
Ըստ պաշտպանի՝ անմեղսունակ ճանաչվելուց հետո վերացվել է նրա նկատմամբ կիրառված խափանման միջոցը եւ կիրառվել է անվտանգության միջոց․ նրան տեղափոխել են հոգեկան առողջության կենտրոն։
«Այս պահի դրությամբ ինքը ենթակա չէ քրեական պատասխանտվության։ Դատական նիստ պետք է լինի եւ դատարանը որոշի՝ ուղարկելու է հարկադիր բուժման թե ոչ։ Դեռ նիստի օր նշանակված չկա։ Եթե դատարանը որոշի, որ պետք է ուղարկի հարկադիր բուժման, ապա բուժում կստանա, իսկ եթե՝ ոչ, ապա կգնա տուն»։
Հիշեցնենք՝ հունվարի 23-ին ոստիկանությունն ահազանգ էր ստացվել, որ «Էրեբունի պլազայում» զինված անձը կրակոցներ է արձակել։ Դեպքի վայրում նրա հետ բանակցել էր այն ժամանակ դեռ ոստիկանապետի ժամանակավոր պաշտոնակատար Արման Սարգսյանը: Ավելի ուշ տղամարդը՝ ոստիկանապետի ուղեկցությամբ, հեռացել էր դեպքի վայրից և կալանավորվել:
Թորոսյանին երկու մեղադրանք է առաջադրվել Քրեական օրենսգրքի երկու հոդվածով՝ կյանքի կամ առողջության համար վտանգավոր բռնություն գործադրելով պատանդ վերցնելու (պատժվում է ազատազրկմամբ` 8-15 տարի ժամկետով) և գույքը դիտավորությամբ վնասելու կամ ոչնչացնելու հատկանիշներով (պատժվում է տուգանքով` նվազագույն աշխատավարձի հիսնապատիկից հարյուրապատիկի չափով, կամ կալանքով` առավելագույնը 2 ամիս ժամկետով, կամ ազատազրկմամբ` առավելագույնը 2 տարի ժամկետով):
