ՀՀ պարետ Տիգրան Ավինյանի նոր որոշում է ընդունվել, ըստ որի՝ Հայաստանի Հանրապետության տարածք մուտք գործելու առանձնահատուկ և անհետաձգելի համարվող դեպքերը կրճատվել են։
Նախկինում Հայաստանի Հանրապետության տարածք մուտք գործելու արգելքից բացառություն կարող էր արվել հանգուցյալի մերձավոր ազգականներին հոգեհանգստի կամ թաղման արարողությանը մասնակցելու նպատակով:
Պարետի այսօրվա որոշման համաձայն՝ այդ դրույթն այլևս բացառություն չէ։
Հիշեցնենք, որ երեկ պարետը որոշում էր ստորագրել, որով փակվել է Նորաշեն մուտքն ու ելքը։
Վարչապետ Նիկոլ Փաշինյանը հայտնել էր, որ Նորաշենն ամբողջությամբ փակվում է թաղման ժամանակ ցուցումները չպահելու պատճառով։
Նորաշենը փակ կմնա մինչև ապրիլի 18-ը՝ ժամը 23։59-ը։
Հայաստանում կորոնավիրուսի համաճարակի կորը կառավարելիության տիրույթում է։ Սակայն եթե շարունակվի այն վերաբերմունքը, որ տեսանելի է այս օրերին, կարող է լինել համաճարակի երկրորդ բռնկում։ Այս մասին այսօր կառավարության նիստի ընթացքում ասաց վարչապետ Նիկոլ Փաշինյանը։
Նա պատմեց մի դեպք, երբ Նորաշենում մեկուսացված անձը հուղարկավորության է գնացել ոստիկանի և բուժաշխատողի ուղեկցությամբ, պարետատան թույլտվությամբ։ Սակայն այնտեղ չի պահել սոցիալական հեռավորության և այլ ցուցումներ, գրկախառնվել է հարազատների հետ, իսկ հետագայում նրա մոտ կորոնավիրուս է հաստատվել։
Վարչապետն ասաց, որ այդ պատճառով որոշվել է Նորաշեն գյուղն ամբողջությամբ մեկուսացնել։
