«Պիտի Եկեղեցուց դուրս շպրտվեն այդ փչացած առեւտրականներն ու բիզնեսմենները եւ ըստ արժանվույն գնահատվեն իսկական նվիրյալները…». Գարիկ Ղազարյան

Գարիկ Ղազարյանն իր ֆեյսբուքան էջում նոր գրառում է կատարել, որտեղ ասվում է.

Ըստ իս` այն հոգեւոր պաշտոնյան, ով պատվիրակված է` մարդուն Աստծո խոսքը ճիշտ հասցնելու , մեկնաբանելու, հոգեպես կրթելու եւ ճիշտ դաստիարակելու համար, բայց զբաղվում է ուղղակի դրա իմիտացիայով դեռ հերիք չէ , այլ կողքից էլ թմրանյութի բիզնես անում կամ այլ համանուն բաներով զբաղվում , նա 100 անգամ ավելի փչացած ու մերժելի է , քան մնացածը, ովքեր չլինելով հոգեւորական ` զբաղվում են այդ ամենով :

Եւ, եթե ես կամ մեկ ուրիշը դատապարտում է այդ հանգամանքը , դա դեռ չի նշանակում , թե եկեղեցու դեմ ենք խոսում , ընդհակառակը` պիտի Եկեղեցուց դուրս շպրտվեն այդ փչացած առեւտրականներն ու բիզնեսմենները եւ ըստ արժանվույն գնահատվեն իսկական նվիրյալները :

Ինչպես ավելի վաղ հայտնել էինք, ԱԱԾ-ն հանցավոր ճանապարհով ստացված եկամուտների օրինականացման դեմ պայքարի ոլորտում օրենքով վերապահված լիազորությունների շրջանակում, ՀՀ ԱԱԾ քննչական դեպարտամետում քննվող քրեական գործով ձեռնարկված քննչական և օպերատիվ֊հետախուզական միջոցառումների արդյունքում ձեռք բերված բավարար ապացույցների համակցությամբ 2020 թվականի ապրիլի 13-ին մեղադրանք է առաջադրել Հայ Առաքելական Եկեղեցու թեմերից մեկի առաջնորդական փոխանորդին:

Ստացված փաստական տվյալների համաձայն, վերջինս, 2010 թվականի ամռանն իր հետ քավոր-սանիկական հարաբերությունների մեջ գտնվող անձի հետ նախնական համաձայնությամբ, խարդախությամբ՝ իբրև Աֆրիկայի մայրցամաքում իրեն պատկանող ադամանդի հանքավայրերում 12.000.000 ԱՄՆ դոլար գումարի չափով ներդրում կատարելու դեպքում արտադրողականությունը բարձրացնելու, արդյունահանված ադամանդի հումքը Հայաստանի Հանրապետությունում վերամշակելու և վաճառքի հանելու մտացածին պատրվակով, շահագրգռել է ՀՀ ձեռնարկատերերից մեկին հիշյալ ներդրումը կատարելու հարցում, այնուհետև ձեռք են բերել վերջինիս ու նրա մերձավորներին պատկանող առանձնապես խոշոր չափերի՝ 11.442.068.000 ՀՀ դրամ ընդհանուր արժողությամբ, մի շարք անշարժ գույքերի նկատմամբ իրավունք, դրանց գրավադրմամբ ՀՀ առևտրային բանկից 2010 թվականի հունիսի 28-ից մինչև 2011 թվականի հունիսի 27-ն ընկած ժամանակահատվածում ստացել և անարգել տնօրինել են 3.664.175.000 ՀՀ դրամին համարժեք 9 միլիոն ԱՄՆ դոլար և 361.500.000 ՀՀ դրամ գումարի չափով վարկային միջոցներ, մի շարք բանկային և առևտրային գործարքներով, փոխանցումներով, փոխարկումներով թաքցնելով և խեղաթյուրելով դրանց ծագման աղբյուրը, տեղաշարժն ու պատկանելիությունը:

Հանցավոր եղանակով ստացված եկամուտներն օրինականացնելու համար օգտագործվել է հանցավոր խմբի անդամների կողմից նախապես՝ 2010թ. գարնանը, օֆշորային գոտում հիմնադրված ընկերությունը, որի 33 տոկոսով բաժնեմասը պատկանել է եկեղեցու հիշյալ սպասավորին:

Վերը նշված հանցագործությունները բացահայտվելուց հետո, 2013 թվականի ընթացքում նշված հոգևորականը, օգնելու խոստումներ տալով, համոզել է հետախուզման մեջ գտնվող հանցակցին ստանձնել ամբողջ պատասխանատվությունը և հանցագործությանն իր մասնակից լինելու ապացույցները կեղծելուն կամ ոչնչացնելուն ուղղված գործողություններ ձեռնարկել: