ՀՀ քաղաքացիները կարող են խանութից գնել այն ամենը, ինչ ուզում են եւ որքան ուզում են, եւ ես համոզված եմ, որ այդ ապրանքը չի պրծնի: Այս մասին, այսօր՝ մարտի 16-ին, ԱԺ հատուկ նիստում Արտակարգ դրություն հայտարարելու մասին կառավարության որոշման քննարկման ժամանակ հայտարարեց ՀՀ վարչապետ Նիկոլ Փաշինյանը:
Երբ պատգամավորները տեղից նշեցին, որ իսկապես խանութներում շատ ցուցափեղկեր դատարկվել են, լուսանկարներ կան սոցցանցերում, Փաշինյանն ասաց.
«Ինձ հավաստիացրել են, որ ապրանքները չեն սպառվի. Հիմա գուցե մի ժամվա ընթացքում ինչ-որ մի ապրանքի պակասություն նկատվի, բայց այդ ապրանքը պահեստում կա, ներկրողների հետ խոսվել է: Հիմա որ կոչ անենք, ասենք՝ մի գնացե, մի առեք, մարդիկ կմտածեն՝ այ, ուրեմն մի բան էն չի, մեզ ուզում են չթողնեն, որ առնենք ապրան: Մենք ասում ենք, որ ապրանքի պակաս չկա:
Ես չեմ կարծում, որ էս պահին որեւէ ապրանքի գնումը սահմանափակելու անհրաժեշտություն ունենք: Ես չեմ կարծում, որ որեւէ մեկը այս պահին իր սովորական նորմայից ավելի ապրանք գնելու կարիք ունի»:
Հարցին, թե արդյոք օբյեկտի՞վ է, որ 300-400 դրամանոց սպիրտը սուպերմարկետներում վաճառվում է 3460 դրամով, որի վերաբերյալ նկարներ տարածվում են սոցցանցերում, Փաշինյանը պատասխանեց.
«Ենթադրենք ցուցափեղկում դրված է 100 դամ արժեքով 5 բաժակ, բայց պահեստում էլ կա 1000 բաժակ: Եթե բաժակ ցանկանում է գնել 3 հոգի, ապա գինը բարձրանալու պատճառ չունի, բայց եթե 10 հոգի է ցանկանում բաժակ գնել, մեծ հավանականություն կա, որ վաճառողը բաժակի գինը կդարձնի 200 դրամ: Շուկան է ամեն ինչ որոշում: Մեր կոչն այն է, որ եթե մեզ մի հաց է պետք, երեք հատ չառնենք»:
