Մելիքգյուղում 7 ամսական փոքրիկը շնչահեղձ է եղել։ Այս մասին խոսեց Մելիքգյուղի համայնքապետ Դերենիկ Շահբազյանը՝ անդրադառնալով օրորոցում մահացած հայտնաբերված երեխայի դեպքին։
«Երեխան վատառողջ է եղել, խորխը եկել շնչափողը փակել է, որի հետևանքով խեղդվել է։ Դիահերձարանում էլ նույն բանն են ասել։ Դեպքը կիրակի օրն է եղել, երկուշաբթի պետք է տանեին հիվանդանոց, բայց չհասցրին»,- նշեց Շահբազյանը։
Համայնքապետը նշեց՝ մահացած երեխան երիտասարդ ծնողների առաջնեկն ու միակ երեխան էր․ «Երիտասարդ ընտանիք են, հայրը մոտավորապես 25 տարեկան, մայրը՝ 19-ը»,- ասաց համայնքապետը։
Ավելի վաղ տեղեկացրել էինք՝ երեկ՝ մարտի 9-ին, ողբերգական ու առեղծվածային դեպք է տեղի ունեցել Արագածոտնի մարզում։ Ժամը 08։30-ի սահմաններում «Ծաղկահովիտ» բժշկական կենտրոնից ոստիկանության Արագածի բաժին ահազանգ է ստացվել, որ բժիշկների հերթապահ խումբը կանչով մեկնել է Մելիքգյուղի 1-ին փողոցի տներից մեկը, որտեղ օրորոցի մեջ հայտնաբերել են երեխայի դի։
Պարզվել էր՝ մահացածը 7 ամսական Աննա Կ-ն էր, ում ծնողները իրավապահներին հայտնել են, որ ժամը 07։30-ի սահմաններում օրորոցի մեջ երեխային հայտնաբերել են մահացած վիճակում։ Դատաբժշկի նախնական եզրակացության համաձայն՝ դիակի արտաքին զննությամբ բռնության հետքեր չեն հայտնաբերվել։ Փաստի առթիվ քննչական վարչությունում նյութեր են նախապատրաստվում, քննիչի որոշմամբ նշանակվել է դատաբժշկական փորձաքննություն։
Սոնա Հարությունյան
