Ո՞վ ասաց, որ միայն հեքիաթներում կամ գիտական գեղարվեստական կինոնկարում մարդը կարող է մտնել հսկայի մարմին և դուրս գալ:
Ահա Նիդերլանդներում այս հնարավորությունը ստեղծված է յուրաքանչյուրի համար, որտեղ պարզապես գոյություն ունի աշխարհի միակ մարդկային մարմնի թանգարանը, որտեղ ուղղակի ոտք դնելով՝ հայտնվում եք մարդու մարմնի մեջ և կարող եք շարժվել հսկայական օրգանիզմի բոլոր հատվածներով:
Թանգարանը գտնվում է Լեյդեն քաղաքում՝ մայրաքաղաք Ամստերդամից մեքենայով մոտ 40 րոպեով հեռավորության վրա։ Հեռվից կարելի է տեսնել մի հսկա մարդու՝ նստած դիրքով։ Թանգարանի մուտքը գտնվում է այս հսկա քանդակի ծնկի վրա, ուր պետք է բարձրանալ հատուկ շարժասանդուղքով:
Թանգարանի ներսում իրականում մի ամբողջ քաղաք է, որը բաղկացած է մարմնի տարբեր հատվածներից, որոնց միջոցով կարող եք անցնել, իհարկե, ամուր նյարդեր ունեք:
Թանգարանը սկսվում է արյան էրիտրոցիտների ու լեյկոցիտների ուսումնասիրմամբ, այնուհետ աստիճանաբար այցելուն անցնում է մարդու մարմնի ներքևի հատվածից դեպի վեր։
Ընդհանուր առմամբ, այցելությունն ընթանում է 7 հարկերով, որոնք, այսպես կոչված, հսկա մարդու մարմինն են կազմում:
Յուրաքանչյուր օրգան պատկերված է չափազանց իրական, որ ապագա բժիշկների համար անգամ պարտադիր այցելության վայր է։
Այցելուն հետևում է, թե ինչպես է արյունը պտտվում, ինչպես է աշխատում մարսողական համակարգը և բաբախում հսկա սիրտը: Լսողական և մկանային համակարգեր, ձայնային լարեր, ոսկորներ, ատամներ. Այս ամենը կարելի է մանրամասն ուսումնասիրել և տեսնել «գործողության մեջ»:
Յուրաքանչյուր օրգանի աշխատանքը հեռարձակվում է մոնիտորների միջոցով և ուղեկցվում է իրական հնչյուններով։
Իսկ ահա 5D ձևաչափի ակնոցներն էլ օգնում են լիակատար ընկղմվել օրգանների մեջ ու լիարժեքով հասկնալ ու տեսնել, թե ինչ է կատարվում օրգանիզմում և անգամ, թե ինչպես են օրինակ վատ սովորությունները, այդ թվում ծխախոտն ազդում օրգանիզմի վրա։
Թանգարանում նույնիսկ կարելի է տեսնել, թե ինչպես է արգանդում տեղի ունենում նոր մարդկային կյանքի ծնունդը և պտղի զարգացումը․ այցելուներին ցուցադրվում է նաև ձվի բեղմնավորումը։
Դպրոցական տարիքի այցելուներին հատկապես դուր է գալիս լեզուն, որը ներկայացված է որպես բատուդ, որի վրա սիրում են ցատկել երեխաները։
