ՀՀ պաշտպանության նախարար Դավիթ Տոնոյանին այսօր խորհրդարանում լրագրողները հարց ուղղեցին բանակում զոհված Արթուր Աջամյանի մահվան հանգամանքների վերաբերյալ: Դիտարկմանը, թե իրավապահներն ի վերջո չեն հստակեցնում՝ ինքնասպա՞ն է եղել նա, թե՞ սպանվել, Տոնոյանը վստահեցրեց.
«Կհստակեցնեն, հաստատ կհստակեցնեն»:
Արձագանքելով վարչապետ Նիկոլ Փաշինյանի հայտարարությանը, թե բանակում զոհերի թիվը պատմական նվազագույնի է հասցված, Տոնոյանը նշեց.
«Ես հաստատում եմ այդ տեղեկությունները: Հաշվարկման համակարգի խնդիր կա՝ ինչն է հաշվարկվել նախկինում, ինչը՝ հիմա: Հիմա ամբողջությամբ բոլոր դեպքերը հաշվարկվում են»:
Նախարարից հետաքրքրվեցին՝ ի՞նչ կարելի է անել, որ միջանձնային հարաբերությունների հետևանքով բանակում զոհեր չլինեն:
«Կարգապահության ամրապնդմամբ և սպայական կազմի կրթվածության բարձրացմամբ ամեն ինչի կհասնենք»,- ասաց նա:
