1-in.am-ը ․ «Մասաչուսեթսի Բաբսոն քոլեջի պրոֆեսոր Էշին Ֆենսին նախագահ Թրամփին յուրօրինակ «պատասխան» էր հղել ֆեյսբուքյան իր էջում․ նա առաջարկել է Իրանի իշխանություններին ռմբակոծեն ամերիկյան մշակութային ժառանգության 52 օբյեկտ:
«Ի պատասխան՝ Այաթոլլահ Խամենեին պետք է թվիթ հրապարակի, որում նշի ամերիկացիների կողմից սիրված մշակութային 52 օբյեկտների ցուցակը, որոնք նա նախատեսում է ռմբակոծել: Հմմ … Որո՞նք կարող են լինել այդ ցուցակում: Mall of America-ն թե՞ Քարդաշյանների առանձնատունը», – հեգնել է պրոֆեսորը:
Ավելի ուշ պրոֆեսորը ջնջել է գրառումը: Սակայն քոլեջի ղեկավարությունը միանգամից արձագանքել է՝ հեռացնելով դասախոսին աշխատանքից, և հայտնել է տեղական և դաշնային իշխանությունների հետ համագործակցելու պատրաստակամության մասին, գրում է The Boston Herald-ը:
Ֆենսին հրապարակավ ներողություն է խնդրել. «Ես ցավում եմ իմ անհաջող կատակի համար: Որպես այս երկրում ծնված և մեծացած ամերիկացի, ես փորձել եմ մեր մշակութային վայրերը համեմատել հնագույն իրանական եկեղեցիների և մզկիթների հետ: Ես խստորեն դատապարտում եմ բռնությունը և ափսոսում եմ, որ իմ անխոհեմ կատակը ընկալվել է որպես սպառնալիք»։
74 դիտում , 1 դիտում այսօր
