«Պատվից առավել» հեռուստասերիալի ավարտից հետո հեռուստադիտողները չեն հասցնի կարոտել դերասան Սուրեն Փահլևանյանին, քանի որ հունվարից նա եթերում կլինի Ելենա Արշակյանի նոր՝ «Սիրուն Սոնա» նախագծի շրջանակում: Դերասանը գործընկերների հետ մեկնել էր Շրի Լանկա, որտեղ էլ կայացել է հեռուստասերիալի նկարահանումների մի մասը:
Իր նոր հերոսի՝ Մարատի մասին շատ բացահայտումներ անել Սուրենը չի ցանկանում, որպեսզի հեռուստադիտողները հետաքրքրությամբ սպասեն իր մուտքին հեռուստասերիալ, որը կլինի 10-րդ սերիայում: Մարատը գլխավոր կերպար չէ, սակայն Սուրենը վստահ է՝ իր հերոսը երկրորդ պլանում չի մնա:
Ելենա Արշակյանի թիմի հետ ճամփորդության մեկնելը, ըստ Սուրենի, հաճույք է: Նրա խոսքով՝ տարիների համագործակցության ընթացքում ընտանիքի պես են դարձել:
«Ես պրոֆեսիոնալ դերասան եմ և հասկանում եմ, որ եթե մի ամբողջ թիմ հասել է Շրի Լանկա գեղեցիկ տեսարաններ ստանալու համար, այդ տեսարանները պետք է ստանան: Բաց տեսարան ասվածը հարաբերական է: Ֆիլմում կան անկողնային տեսարաններ, որոնք շատ գեղեցիկ են նկարահանվել»:
Սուրենից հետաքրքրվեցինք, թե ինչպես է կինը՝ հաղորդավարուհի Յանա Դանիելյանն արձագանքում իր մասնակցությամբ նման տեսարաններին. «Կինս, իհարկե, խանդում է, միաժամանակ ինձ շատ է վստահում: Նման տեսարանները չեն կարող խնդիրներ ստեղծել մեր ընտանիքում: Այստեղ ոչ թե Սուրեն Փահլևանյանն ու Էվա Խաչատրյանն են համբուրվում, այլ Մարատն ու Մարգարիտան: Դրանք տարբեր բաներ են:
Դա հասկանում է նաև կինս, որովհետև գիտի, որ ես միայն իրեն եմ սիրում: Ես չեմ հավատում, երբ ասում են՝ զույգը բաժանվեց նման խնդրի պատճառով: Վստահ եմ, որ եթե զույգը բաժանվում է, ուրեմն այլ խնդիրներ է ունեցել: Յանան գիտի, որ ես միայն իրեն եմ սիրում: Դրանով ամեն ինչ ասված է»:
