Ազգային ժողովում 2020 թվականի բյուջեի նախագծի քննարկման ժամանակ վարչապետ Նիկոլ Փաշինյանն անդրադարձավ քննադատություններին, որ հաջորդ տարվա բյուջեի նախագծում ցածր՝ 4.9 տոկոս տնտեսական աճի կանխատեսում է դրված:
«Մի քիչ ցածր դնում ենք, բարձր թռնում ենք»,- հայտարարեց Փաշինյանը:
Նա նշեց, որ 2019 թվականի բյուջեի նախագծում էլ է դրված եղել 4.9 տոկոս տնտեսական աճ: Իսկ այսօր՝ 2019 թվականի նոյեմբերին ո՞վ է խոսում 4.9 տոկոս տնտեսական աճի մասին, ոչ ոք, որովհետև 4.9 տոկոս տնտեսական աճը Հայաստանի համար աբսուրդ է:
«Այսօր բոլոր կանխատեսումներով 2019 թվականի տնտեսական աճը 6 տոկոսը կգերազանցի, լավատեսական ցուցանիշներով կհասնի 7 տոկոսի»,- ասաց Փաշինանը: Ըստ նրա՝ բյուջեն ունի պլան մինիմում և պլան մաքսիմում:
«Մեր ռազմավարական տեսլականը երկնիշ տնետսական աճին հասնելն է: Այսօր ինչո՞ւ չենք կարողանում հասնել երկնիշ տնտեսական աճի: Ամենամեծ պրոբլեմը մեր ունեցած կապիտալ ծախսերի ոլորտում ունեցած պրոբլեմն է»,- ասաց նա, հավելելով, որ կապիտալ ծախսերի թերակատարումը Հայաստանում եղել է խրոնիկ պրոբլեմ, հիմա խորացել է, որովհետև իրենք համաձայն չեն ատկատներով աշխատել:
«Եվ մենք այդ փողերը չծախսելով՝ այսօր խոսում ենք 6-ից բարձր տնտեսական ակտիվության ցուցանիշի մասին: Այո, մենք ինքներս մեր ցուցանիշները վատացնում ենք, որովհետև լավացնում ենք որակը, մենք չենք գնում այսօրվա ցուցանիշի հետևից, մենք վաղվա ցուցանիշի հետևից ենք գնում: Որ պահին մենք կապիտալ ծախսերի որակն ու ծավալը նույնականացրինք, դա այն կետն է, որ հասնելու ենք երկնիշ տնտեսական աճի»,- հայտարարեց Փաշինյանը:
