ՔԿՀ-ներում «օրենքով գողեր», «քրեական հեղինակություններ» կան.
Արդարադատության նախարար Ռուստամ Բադասյանն է նշել այս մասին՝ լրագրողների հետ զրույցում՝ հավելելով, թե քրեակատարողական հիմնարկներում խորքային խնդիրներ է տեսնում:
Անդրադառնալով հարցին, թե դատավորների նկատմամբ կարգապահական վարույթներ են հարուցվել, և քանի՞ դատավորի վերաբերյալ է որոշում կայացվել՝ Ռուստամ Բադասյանը պատասխանեց, որ երկու դատավորի մասով միջնորդություն է ներկայացվել դատական խորհրդին։
«Տպավորություն է, որ ամենավատ համակարգը դատական համակարգն է։ Ես ուզում եմ այդ տպավորությունները ցրել։ Դատական համակարգը ունի այնքան խնդիրներ, որքան մյուս պետական մարմինները։ Դատավորների նկատմամբ տրամադրվածություն չկա, և պատժիչ ֆունկցիաներ չեն կիրառվելու։ Կարգապահական վարույթներ են հարուցվելու, և միջնորդություն ներկայացվելու է Բարձրագույն դատական խորհրդին, երբ վստահ լինենք, որ տեղի են ունեցել կարգապահական խախտումներ»,- ասաց նա։
