Քննչական կոմիտեն քրեական գործ է հարուցել Հայաստանի նախկին ոստիկանապետ, Մարտի 1-ի գործով գլխավոր վկաներից մեկի՝ Հայկ Հարությունյանի մահվան դեպքի առիթով՝ ինքնասպանության կամ ինքնասպանության փորձի հասցնելու հատկանիշներով: Քննչական կոմիտեն հաղորդում է, որ հարցաքննվել են տարբեր վկաներ:
Միևնույն ժամանակ, նախաքննական մարմինը հերքում է մամուլում առավոտյան շրջանառվող այն տեղեկատվությունը, թե Հայկ Հարությունյանը մահվանից առաջ իր մոտ գտնվող անձին բողոքել էր Մարտի 1-ի գործով տարվող քննությունից, ասել էր, որ իր վրա ճնշում են գործադրում, որպեսզի Հայաստանի երկրորդ նախագահ Ռոբերտ Քոչարյանի և ոստիկանության զորքերի հրամանատարի նախկին տեղակալ Գեղամ Պետրոսյանի դեմ ցուցմունքներ տա: Քննչական կոմիտեն վստահեցնում է, որ վկան, որը նախկին ոստիկանապետի կողքին է եղել, նման տեղեկատվություն իրենց չի հաղորդել, և առհասարակ նրանց միջև խոսակցությունը չի առնչվել Մարտի 1-ի գործին:
Նախաքննական մարմինը նաև քիչ առաջ հաղորդեց, որ Հայկ Հարությունյանը ալկոհոլի ազդեցության տակ է եղել:
Նախկին ոստիկանապետի դին հայտնաբերել են Բջնիի իր առանձնատանը՝ գլխի շրջանում հրազենային վնասվածքով:
Բջնի գյուղում Հայկ Հարությունյանին ճանաչողները ցավով են խոսում դեպքի մասին, ամեն դեպքում՝ չեն կապում տեղի ունեցածը Մարտի 1-ի գործի հետ, խուսափում են այս հարցին պատասխանելուց, նշում են միայն, որ շատ են զարմացել, քանի որ, ինչպես նրան ճանաչողներն են ասում, նախկին ոստիկանապետը հավասարակշռված անձնավորություն էր, իր առանձնատանը զբաղվում էր թռչուններով, ծառեր էր աճեցնում:
Մասնավորապես, Բջնի գյուղի վարչական ղեկավար Արմեն Մաթևոսյանը նշեց, որ 20 տարուց ավելի ճանաչում է Հայկ Հարությունյանին:
«Ես չեմ պատկերացնում՝ Բջնի գյուղում լինի մի մարդ, մի բնակիչ, որ Հարությունյան Հայկի մասին բացասական բառ արտահայտի: Անակնկալ ո՞րն ա՝ անակնկալը շատ փափուկ ա ասված, մինչև հմի ես հլը չեմ հասկանում, որ սենց բան էղել ա, որովհետև Հայկ Հարությունյանը շատ կշռադատված, հավասարակշռված, շատ լավ, շատ լավ ընտանիքի հայր էր էրեխեքի, ամուսին, և շատ լավ մարդ էր առհասարակ ինքը, շատ լավ մարդ էր: Սաղս էլ հասկանում ենք՝ որտեղից պտի գա էս քայլի սկիզբը, աղբյուրները, սաղս էլ հասկանում ենք <…>, բայց չեմ պատկերացրել, որ ինքը կգնա էդ քայլին: Նախ ինքը շատ նաև, ոնց ասեմ, թույլ տղա չէր, պինդ տղա էր ինքը, շատ պինդ տղա էր, ես չեմ պատկերացնում, որ կարող ա ինքը գնար էս քայլին, ըտե գնալու նշանակում ա նենց հիմքեր են էղել, որ ինքը գնացել ա դրան», — «Ազատության» հետ զրույցում ասաց Բջնի գյուղի ղեկավարը:
