«Ազգային համաձայնություն» կուսակցության հիմնադիր Արամ Հարությունյանն այսօր «Հայելի» ակումբում անդրադարձավ երեկ Շենգավիթի դատարանի մոտ տեղի ունեցած միջադեպին: Երեկ ՀՀ 2-րդ նախագահ Ռոբերտ Քոչարյանի դատական նիստի ավարտից հետո, դատարանի տարածքից դուրս, Արամ Հարությունյանը հարվածել էր մի տարեց կնոջ՝ Սվետլանա Միքայելյանին, իր պնդմամբ, իրեն «թուրք» անվանելու համար:
Հետո, երբ ոստիկանները Հարությունյանին հեռացնում էին եւ փորձում նստեցնել ոստիկանական մեքենան, մի խումբ քաղաքացիներ էին մոտեցել նրան, այդ թվում Մարտի 1-ի զոհերից՝ Արմեն Ֆարմանյանի եւ Գոռ Քլոյանի հայրերը, Արմեն Ֆարմանյանի հայրը՝ Վաչագան Ֆարմանյանը հարվածել էր Հարությունյանին:
Արամ Հարությունյանն այսօր ասուլիսին խոսելով միջադեպի մասին, մասնավորապես այդ տարեց կնոջ մասին, ասաց. «Եվ տղամարդիկ եւ կանայք վատ արտահայտություններ էին անում, ասում՝ թուրք, ու ավելի վատ բաներ: Մեր հետեւից էին գալիս, ու երբ մոտեցան հավասարվեցին մեզ, մեկն ասաց՝ թուրք, բալիդ թաղեմ, ու ինձ համար արդեն սահմանն անց էր:
Եվ ես հարվածեցի: Խնդիրն այն է, որ այս ամբողջ կեղտը կա ֆեյսբուքում, այս տարիքով կինը, բնականաբար ֆեյսբուքից չի օգտվում, բայց կարելի է ասել, որ ինքը Լեւոն Տեր-Պետրոսյանի եւ Նիկոլ Փաշինյանի քայլող ֆեյքերից է: Եվ այդ հարվածը, որի համար, որպես կին, ես ցավում եմ, բայց մյուս կողմից էլ այդ հարվածը դիտում եմ Լեւոն Տեր-Պետրոսյանին եւ Նիկոլ Փաշինյանին ուղղված: Գեղեցիկ չստացվեց, որ հարվածը ստացավ այդ կինը, բայց նման կարգի մարդիկ, անկախ սեռից, պիտի հասկանան, որ կստանան արժանի պատասխան»:
Ապա Հարությունյանն ասաց. «Ես ուղղակի ցավում եմ, ես հորդորում եմ, ես ներում եմ Ֆարմանյանին, որովհետեւ, չեմ ուզում վատ բան ասել, իրենք օգտագործվում են Լեւոն Տեր-Պետրոսյանի եւ Նիկոլ Փաշինյանի կողմից: Նույն Ֆարմանյանը օգտագործվում է, շատ ներողություն, ի վերջո, վերեւից իրենց զավակները նայում են, շատ մարդ գիտի, ինչ է եղել…»:
