«Մարտի 1-ի կոծկման համար մեկ պատասխանատուն Աղվան Հովսեփյանն է». Անդրանիկ Քոչարյան

«Ռոբերտ Քոչարյանը կարող էր շատ ավելի հեռուն գնալ և հայտարարել, թե Մարտի 1-ի գործը չբացահայտելու համար մեղավոր է ոչ միայն Գլխավոր դատախազը, այլև իրենից հետո իշխանությունը ստանձնած Սերժ Սարգսյանը», — Ազատության հետ զրույցում նշեց Մարտի 1-ի գործով փաստահավաք խմբի նախկին անդամ, խորհրդարանի պաշտպանության և անվտանգության հանձնաժողովի նախագահ Անդրանիկ Քոչարյանը («Իմ քայլը»)՝ անդրադառնալով երեկ դատարանում Քոչարյանի այն հայտարարությանը, որ գործը չբացահայտելու համար առաջին հերթին պետք է դատել «Գլխավոր դատախազին կամ վարույթ իրականացնող դատախազին կամ քննչական մարմիններին, որոնք պարտավոր էին գործը բացահայտել»:

Անդրանիկ Քոչարյանը շարունակեց․ — «Սերժ Սարգսյանը տասը տարի կառավարել է երկիրը, և ըստ էության, գործը ոչ թե չի բացահայտվել, հայտարարվել է, որ պետք է բացահայտվի, բայց իրականում ամեն ինչ արել են դրա չբացահայտման համար: Եվ միայն իշխանափոխությունն է, որ հնարավորություն է տվել այս գործընթացները արագ նորից առաջ տանելու, և այսօր մենք ունենք դատաքննությանը մոտ պրոցես, և ես կարծում եմ, որ դատաքննությունն է, որ տալու է այդ բոլոր հարցերի պատասխանը»:

«Ազատություն»․ — Դուք նկատո՞ւմ եք այդպիսի մարտավարություն, որ Ռոբերտ Քոչարյանը փորձում է սահմանազատել իրեն որոշումների չկայացումից, գործի չբացահայտումից, որ նա որևէ կապ կարծես չունի այդ ամենի հետ:

Անդրանիկ Քոչարյան․ — Նաև մարդկանցից, որոնք որոշում կայացնողների մեջ են եղել և այսօր իրենք չկան ֆիզիկապես, մահացել են: Շատ դեպքերում ինքը հղում է անում նաև այդ մարդկանց վրա՝ ասենք Գորիկ Հակոբյանին, փախած Միքայել Հարությունյանին, մյուսներին: Դա, բնականաբար, խնդիր չի լուծում, որովհետև անուղղակի բավականին ապացույցներ կան ձեռք բերված և ցուցմունքներ, որոնք ապացուցում են հակառակը: Այնպես որ, սահմանազատվել պարզապես հնարավոր չի: Եթե շատ սահմանազատվի, մի օր էլ ինքը պետք է հրաժարվի, որ ինքը եղել է այս երկրի նախագահը:

«Ազատություն»․ — Ձեզ համար կասկածելի չէ՞, որ այս գործում դեռևս որևէ կերպ ներգրավված չէ Գլխավոր դատախազը:

Անդրանիկ Քոչարյան․ — Աղվան Գառնիկովիչի մասի՞ն եք ասում: Ես բազմիցս եմ ասել, որ Աղվան Հովսեփյանը չի կարող անմասն լինել այս գործընթացից, որովհետև ինքը ոչ միայն Գլխավոր դատախազ է եղել, ինքը քաղաքական բնույթի Գլխավոր դատախազ է եղել և իրականացրել է արդարադատությունը տվյալ պահին իշխանություն ներկայացնող ուժերի քիմքին համահունչ:

«Ազատություն»․ — Ինչո՞ւ է նախաքննությունը նրա մասին մոռացել:

Ես էլ եմ կարծում, որ այդ հարցը պետք է անընդհատ հիշեցնել, մինչև Աղվան Հովսեփյանը հայտնվի և ինքն էլ պատասխանի բազմաթիվ հարցերի: Գուցե Աղվան Հովսեփյանը ակտիվ աջակցո՞ւմ է նախաքննությանը այս պահին: Դա էլ ես չեմ բացառում: Ուրիշ բացատրություն ես չեմ տեսնում: Ինքը Գլխավոր դատախազի կարգավիճակից երևի վեր է ածվել ակտիվ աջակցողի կարգավիճակի, երևի ինչ-որ մասնակցություն ունի, աջակցում է նախաքննությանը: Բայց մեկ է, դա իրեն չի փրկելու, ինքը անպայման պետք է հայտնվի մեղադրյալ աթոռին, համոզված եմ, որովհետև իր պաշտոնն այնպիսին էր, որ այդ պաշտոնյան պետք է շատ բան պարտադրեր նախաքննական մարմնին, որպեսզի նրանք իրականացնեին բացահայտում, այլ ոչ թե կոծկում: Կոծկման համար մեկ պատասխանատուն այդ ժամանակվա գլխավոր դատախազ Աղվան Հովսեփյանն է»:

Loading

Մի մոռացեք կիսվել Ձեր ընկերների հետ