Նախավարժանք մեծ խաղից առաջ. ինչի մասին էր Քոչարյանի գործով ՍԴ որոշումը
Ռոբերտ Քոչարյանի գործով Սահմանադրական դատարանի վճիռը «ավարտվեց ոչ ոքի»: Սա, իհարկե, պայմանական բնորոշում է, սակայն ակնառու է, որ ՍԴ վճիռը խորացրեց Քոչարյանի գործում, այսպես ասած, իրավա-քաղաքական թնջուկը:
Իհարկե, թնջուկի մասով էլ կան տարբեր կարծիքներ, որովհետև հանրության մի զգալի մասի համար նա մեղավոր է և պետք է պատասխան տա առանց ավելորդ իրավական սեթևեթանքի, մեկ այլ մաս ուզում է ավելի համոզիչ և փաստարկված, այսպես ասած, պաշտպանական կողմին կառչելու տեղ չտվող գործընթաց, այդպիսով նաև որպես արդարադատության հետագա արդիականացման նախադրյալ, իսկ մեկ այլ մաս ընդամենը համարում է, որ նա հերոս է:
ՍԴ որոշումը սնուցում է հենց այս իրավիճակը, չտալով հանգուցալուծման որևէ բանալի: Հասկանալի է, որ որևէ բանալի էլ չէր լինելու միարժեք ընկալելի, սակայն, այդուհանդերձ, որոշակիությունը կլիներ ինչ-որ բան: Իսկ առայժմ Քոչարյանի պաշտպանները պնդում են, որ ՍԴ որոշմամբ նա պետք է ազատ արձակվի, իսկ մյուս կողմում կարծիքներ են, որ ՍԴ որոշումը չի տալիս այդպիսի հիմք: