«Հայաստան». Նիկոլ Փաշինյանն Արտաշատում Սևակ արտասանեց

Նիկոլ Փաշինյանը նշեց, որ հայ ժողովուրդը փոքր ժողովուրդ չէ, հայ ժողովուրդը Գրիգոր Նարեկացուց, Գրիգոր Լուսավորչից եւ Տիգրան Մեծից սերված ժողովուրդ է: «2018 թվականին հայ ժողովուրդը ստանձնել է մի մեծ առաքելություն, դա մարդկությանն ու պատմությանն ասելիք ունենալն է:

Նիկոլ Փաշինյանն Արտաշատում արտասանեց Պարույր Սեւակի «Հայաստան» բանաստեղծությունը: «Ես ցանկանում եմ հարգանքի տուրք մատուցել մեր մեծերից Պարույր Սեւակին, ով ծնվել է Արարատի մարզում:

«Իմ քաղցրանո՜ւն,

Իմ բարձրանո՜ւն,

Իմ տառապա՛ծ,

Իմ փառապա՛նծ:

Հների մեջ՝ դու ալեհեր,

Նորերի մեջ՝ նոր ու ջահել.

Դու՝ խաղողի խչմարված վազ,

Վշտերըդ՝ ջուր, ինքըդ ավազ.

Դու՝ բարդենի սաղարթաշատ,

Առուն ի վար փռված փշատ.

Դու՝ կիսավեր ամրոց ու բերդ,

Մագաղաթյա մատյանի թերթ.

Դու՝ Զվարթնոց — ավեր տաճար,

Կոմիտասյան Ծիրանի ծառ.

Դու՝ ջրաղաց խորունկ ձորում,

Դու՝ հորովել անուշ ծորուն,

Փայլ գութանի արծաթ խոփի.

Դու՝ նե՛տ, նիզա՛կ, մկո՛ւնդ կոպիտ,

Դու՝ հայրենի ծխանի ծուխ,

Դու՝ անգի՛ր վեպ, դու՝ Սասնա ծո՜ւռ…

Իմ փառապա՛նծ

Իմ տառապա՛ծ,

Իմ բարձրանո՜ւն,

Իմ քաղցրանո՜ւն:

Դու՝ մրգերի շտեմարան,

Ոսկեվազյան գինու մառան.

Դու՝ թավշե դեղձ, դու՝ փրփուր հաց,

Արտաշատյան խաղող սևաչ.

Դու՝ Սևանի վառվող կոհակ,

Երևանի սյուն ու խոյակ.

Դու՝ հանգրվան, կանչող փարոս,

Դու՝ հայկական գերբ ու դրոշ.

Խոսուն վկա կոտորածի

Ու վճիտ աչք ցամքած լացի,

Արդարության ահեղ ատյան,

Սրի պատյան,

Սիրո մատյան —

Միշտ հի՛ն ու նո՛ր իմ Հայաստան»:

Վերջում Նիկոլ Փաշինյանը նշեց, որ իրենց առջեւ դրված պարտականությունը կատարելու համար իրեն ժողովրդի վստահության քվեն է պետք եւ իրեն անհրաժեշտ է քաղաքացիներից յուրաքանչյուրի քվեն: