Եղանակային պայմանները, մասնավորապես ձյան տեղումները հանգեցրել են չվերթների չեղարկման կամ ուշացման Գերմանիայի երեք խոշորագույն օդանավակայաններում։
Այս մասին հայտնում է Deutsche Welle-ն։
«Ելնելով կանխատեսվող եղանակային պայմաններից՝ հունվարի 5-ին, հատկապես առավոտյան, սպասվում են թռիչքների սահմանափակումներ և չեղարկում», — հայտարարել է Մյունխենի օդանավակայանը։
Ֆրանկֆուրտի օդանավակայանը նախազգուշացրել է նմանատիպ խափանումների և չեղարկումների մասին առավոտյան ժամերին և ճանապարհորդներին խորհուրդ է տվել ստուգել իրենց թռիչքների կարգավիճակը նախքան օդանավակայան մեկնելը:
Ֆրանկֆուրտում ստիպված են եղել չեղարկել մի քանի չվերթ, այդ թվում՝ դեպի եվրոպական հայտնի քաղաքներ, ինչպիսիք են Փարիզը, Վենետիկը և Պրահան։
Գերմանիայի հարավ-արևմուտքում գտնվող Շտուտգարտի օդանավակայանը նույնպես մի քանի ուշացումներ է գրանցել:
Միևնույն ժամանակ, գերմանական Deutsche Bahn (DB) երկաթուղային օպերատորը նույնպես զգուշացրել է, որ եղանակային պայմանները հանգեցնում են ուշացումների և գնացքների մասնակի կամ ամբողջական չեղարկման։
