Վանաձորի համայնքապետարանի ճարտարապետության բաժնի պետ Սուրեն Աբովյանի կալանքը փոխարինվել է տնային կալանքով, հայտնում է «Ազատություն»-ը:
Մոտ 5 ամիս առաջ Աբովյանը կալանավորվել էր վանաձորցի գործարարներից շինարարության հետ կապված պաշտոնական փաստաթղթերի դիմաց կաշառք ստանալու մեղադրանքով:
Նրա երկամսյա կալանքի ժամկետը մեկ անգամ երկարացվել էր: Փաստաբանների հերթական միջնորդությունն այս անգամ դատարանը բավարարել ու նրա խափանման միջոցը փոխել է:
Նույն գործով մեղադրվում են նաև վանաձորցի գործարարներ Բագրատ Դարբինյանը, Ռուբեն Հովհաննիսյանն ու Կամո Գևորգյանը: Դատական գործի հակիրճ նկարագրության մեջ նշված է, որ Ռուբեն Հովհաննիսյանը մեկ միլիոն դրամի, Բագրատ Դարբինյանը՝ 3 միլիոն դրամի, իսկ Բազում գյուղի բնակիչ Կամո Գևորգյանը 20 հազար դոլարի կաշառք են տվել համայնքապետարանի պաշտոնյային:
Ըստ դատական գործի՝ նրանց ու ճարտարապետի համար միջնորդ է եղել «Մարգարյան Բիլդինգ Գրուպ» ընկերության սեփականատեր Սամվել Մարգարյանը, որը նույնպես մեղադրյալ է։ Բացի ճարտարապետից, մյուս մեղադրյալները հեռանալու արգելքով ազատության մեջ են։
