Դեկտեմբերի 25-ին տեղի է ունեցել Իլհամ Ալիևի հրամանով ստեղծված Պետական հանձնաժողովի նիստը՝ ինքնաթիռի կործանման պատճառները հետաքննելու համար։
Ինչպես հաղորդել է ԱՊԱ-ն, այս մասին հայտնել է նախարարների կաբինետը։
Աշխատանքներ են տարվում ինքնաթիռի կործանման հետևանքով զոհվածների ինքնությունը պարզելու, նրանց հարազատներին հայտնաբերելու ուղղությամբ։ Հանձնարարական է տրվել անհետաձգելի միջոցներ ձեռնարկել զոհվածների ընտանիքների ու հարազատների հետ անհրաժեշտ աշխատանքներ իրականացնելու համար։
Համապատասխան միջոցներ են ձեռնարկվում նաև Ակտաուում բուժում ստացող Ադրբեջանի քաղաքացիների տեղափոխման ուղղությամբ:
Ինչպես ավելի վաղ հայտնել էինք, Azerbaijan Airlines ավիաընկերության՝ Բաքվից Գրոզնի թռչող ինքնաթիռը Ղազախստանի Ակտաու քաղաքում կործանվել է:
Նախնական տեղեկություններով՝ ինքնաթիռում եղել է 67 ուղևոր և անձնակազմի 5 անդամ։ Բաքու-Գրոզնի չվերթն իրականացնող օդանավը բախվել է թռչունների երամին, ինչի հետևանքով խախտվել է ղեկի կառավարումը: Անձնակազմը վթարային իրավիճակ է հայտարարել՝ ստիպված լինելով վայրէջք կատարել Ակտաուում։ Վայրէջքի պահին այն կործանվել է: Օդանավում եղել է Ադրբեջանի 37, Ղազախստանի 6, Ղրղզստանի 3 և ՌԴ-ի 16 քաղաքացի:
