Չինացի կրիպտոմիլիոնատեր Ջասթին Սանը կերել է կպչուն ժապավենով պատին ամրացված բանանը, որը հեղինակավոր Sotheby’s աճուրդում գնել էր 6,2 միլիոն դոլարով, գրում է Barrons-ը։
Հոդվածում ասվում է, որ Սանը Հոնկոնգի ամենաթանկ հյուրանոցներից մեկում լրագրողների աչքի առաջ կերել է բանանը՝ պոկելով այն պատից:
Նշենք՝ պատին կպչուն ժապավենով ուղղակի ամրացված բանանն իտալացի նկարիչ Մաուրիցիո Կատելանի The Comedian վիճահարույց ինստալյացիան է, որը «խորհրդանշական» է որակվել:
«Այն իսկապես ավելի համեղ է, քան մյուս բանանները»,- ասել է Սանը համտեսից հետո:
Կատելանի՝ կպչուն ժապավենով պատին ամրացված բանանի ինստալյացիան առաջին անգամ ներկայացվել էր 2019-ին Մայամիում Art Basel ժամանակակից արվեստի ցուցահանդեսի շրջանակում:
Այն ժամանակ Կատելանը խոստովանել էր, որ բանանը գնել է 30 ցենտով, ավելի ուշ ինստալյացիան վաճառվել էր 120,000 դոլարով՝ միջազգային մամուլում բուռն քննարկումներ առաջացնելով ժամանակակից արվեստի ընկալման և արժևորման մասին: Կատելանը բացատրել է, որ սա «սադրանք է, որը կոչ է անում խորհելու արվեստի արժեքի մասին»:
