Ուղիղ մեկ ամիս առաջ Գյումրիում իշխող «Բալասանյան» դաշինքը ողջ կազմով, այդ թվում՝ քաղաքապետ Վարդգես Սամսոնյանը, ավագանու մանդատները վայր դնելու արձանագրություն ներկայացրին, որը քաղաքում կառավարման ճգնաժամի բերեց:
Փաստացի Գյումրին այս պահին որոշումներ կայացնող չունի:
Հաշվի առնելով ստեղծված իրավիճակը՝ վարչապետ Նիկոլ Փաշինյանն առաջարկել է դեկտեմբերի 8-ին, 9-ին, 10-ին Գյումրիում անցկացվել նախնական ընտրություններ, միջազգային լեզվով ասած՝ փրայմըրիզ:
«Քաղաքացիական պայմանագիր» խմբակցության ղեկավար Հայկ Կոնջորյանը «Հայկական ժամանակ»-ի հետ զրույցում կարծիք է հայտնում, որ ստեղծված ճգնաժամի պատճառը Գյումրու ընտրված իշխանության ծայրահեղ անպատասխանատու վերաբերմունքն է:
Նրա խոսքով՝ «Քաղաքացիական պայմանագիր»-ը որպես կառավարող ուժ չի կարող անտարբեր լինել իրավիճակի նկատմամբ:
«Ինչ ենք մենք ասում, ասում ենք, որ հասկանանք, թե վարչապետն ում նշանակի պաշտոնակատար, որոշել ենք գնալ փրայմրըիզի ճանապարհով. տեղի կունենա նախնական ընտրություն, և որոշակի թեկնածուներ կառաջադրվեն, որից հետո վարչությունը, ըստ էության, կհաստատի թեկնածությունների որոշակի շրջանակ, և ապա գյումրեցիներին մենք կգնանք ու կհարցնենք, կասենք՝ սիրելի գյումրեցիներ, ում եք դուք տեսնում որպես Ժ/Պ: Մենք հնարավորություն կտանք, որ այդ նշանակման գործին մասնակցեն նաև գյումրեցիները»,- ասում է նա:
Հարցին՝ ինչո՞վ է կարևոր փրայմըրիզի ճանապարհով գնալը, Կոնջորյանը պատասխանում է՝ կարևոր է խթանել մրցակցությունը, քանի որ այդ դեպքում է, որ կայանում են քաղաքական գործիչները:
Իսկ թե բուն ընտրությունները Գյումրում ե՞րբ տեղի կունենան, վերջինս չի կարող ասել, որովհետև կան օրենսդրությամբ սահմանված որոշակի ընթացակարգեր:
Առավել մանրամասն՝ ռեպորտաժում:
