Ռուսաստանը Հայաստանի հետ ՀԱՊԿ շրջանակներում լիարժեք գործընկերության վերականգնման հույս ունի, կազմակերպության դռները բաց են Երևանի համար:
Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Մենք ակնկալում ենք, որ ելնելով երկրների բարեկամական և ողջ տարածաշրջանի ապագա անվտանգության շահերից, մեր գործընկերությունը Հայաստանի հետ ՀԱՊԿ շրջանակներում լիովին կվերականգնվի և Երևանը ՀԱՊԿ-ում կվերադառնա լայնածավալ համագործակցությանը»,- ասել է նա:
Դիվանագետն ընդգծել է, որ Ռուսաստանը կասկածի տակ չի դնում յուրաքանչյուր պետության ինքնիշխան իրավունքը՝ ինքնուրույն որոշել իր արտաքին քաղաքական կուրսը, այդ թվում՝ ՀԱՊԿ միջոցառումներին մասնակցելու հարցում։
Զախարովան նաև հույս է հայտնել, որ Հայաստանի գործընկերները կհաղթահարեն իրենց կասկածները և կվերսկսեն համատեղ աշխատանքը Ռուսաստանի հետ։
Ավելի վաղ հայտնել էինք, ՀՀ վարչապետ Նիկոլ Փաշինյանը չի մասնակցի նոյեմբերի 28-ին Ասատանայում կայանալիք ՀԱՊԿ գագաթնաժողովին:
Հայաստանի արտաքին գործերի նախարար Արարատ Միրզոյանը ևս չի մասնակցելու Հավաքական անվտանգության պայմանագրի կազմակերպության արտաքին գործերի նախարարների, պաշտպանության նախարարների և անվտանգության խորհրդի քարտուղարների հանձնաժողովի համատեղ նիստին։
