Հայաստանը մտադիր է Հնդկաստանից 78 միավոր հնդկական ATAGS (Advanced Toved Artillery Gun Sistem) տեսակի հրետանային համակարգ գնել:
Այս մասին հայտնում է Indian Defence Research Wing-ը՝ նշելով, որ բանակցություններ են ընթանում:
«Հայաստանն ակտիվ բանակցություններ է վարում Kalyani Strategic Systems Limited (KSL), Bharat Forge պաշտպանական ստորաբաժանման հետ 78 ժամանակակից քարշակվող հրետանային կայանքների (ATAGS) գնման շուրջ: Վեց հաուբիցից բաղկացած առաջին խմբաքանակը հաջող փորձարկումներ է անցել Հայաստանում, այդ թվում՝ բարձրլեռնային տեղանքում և հարթավայրում։
Դրանք դրսևորել են բացառիկ հնարավորություններ երկրի տարբեր լանդշաֆտներում։
Փորձարկումները հաստատել են համակարգի ճշգրտությունը մեծ հեռավորությունների վրա, ինչի արդյունքում Հայաստանի իշխանությունները դիտարկել են ավելի մասշտաբային ծավալներով գնումների հնարավորությունը»,- գրել է պարբերականը:
Հայկական բանակը, ըստ պարբերականի, աննշան թարմացումներ է առաջարկել հրետանային համակարգի հետագա ադապտացման համար։
«ATAGS-ի 78 լրացուցիչ միավոր ձեռք բերելու հեռանկարային գործարքը Հայաստանի և Հնդկաստանի միջև աճող պաշտպանական համագործակցության ևս մեկ հանգրվան է»,- ասվում է հրապարակման մեջ:
ATAGS հրետանային համակարգը հնդկական պաշտպանական հետազոտությունների և զարգացման կազմակերպության (DRDO) և մասնավոր ընկերությունների համատեղ մշակումն է:
