Գյումրու քաղաքապետ Վարդգես Սամսոնյանի պաշտոնական հրաժարականի մասին տեղեկություն դեռ չկա, սակայն քաղաքում վերջին շաբաթներին ստեղծված իրավիճակն ու «Բալասանյան» դաշինքի՝ մանդատները վայր դնելու վերաբերյալ շրջանառվող լուրերը հաշվի առնելով՝ «Քաղաքացիական պայմանագիր»-ը վարչության նիստ է գումարել և քննարկել այս հարցի հնարավոր հանգուցալուծումը:
«Հայկական ժամանակ»-ի հետ զրույցում այս մասին ասաց ԱԺ «Քաղաքացիական պայմանագիր» խմբակցության պատգամավոր Կարեն Սարուխանյանը:
«Պրոցեսը քաղաքական է, և մեր քաղաքական թիմը թեկնածուի մասով որոշում է կայացել: Ես այս պահին իրավասու չեմ այդ մասին ուղիղ խոսել: «Քաղաքացիական պայմանագիր» կուսակցությունը պաշտոնական հայտարարությամբ հանդես կգա»,- ասաց նա:
Հարցին՝ չի՞ հերքում, որ ինքն է Գյումրու քաղաքապետի թեկնածուն, Սարուխանյանը նշեց՝ կուսակցությունը հստակ մոտեցում ունի, տարածքային կազմակերպությունների նախագահները դիտարկվում են որպես տվյալ համայնքում քաղաքական թիմի առաջնորդ, ընտրություններում՝ ՔՊ թեկնածու:
Նշենք, որ Կարեն Սարուխանյանը «Քաղաքացիական պայմանագիր» կուսակցության Գյումրու տարածքային կազմակերպության նախագահն է:
Հարցին՝ արդյո՞ք քաղաքապետի հրաժարականը Գյումրին կոլապսի կտանի, նա ասաց՝ եթե կենսական նշանակության բաժինների ղեկավարները ևս հրաժարվեն իրենց պաշտոններից, որոշ ժամանակ խնդիրներ կառաջանան:
«Եթե նման բան եղավ, դա կլինի «Բալասանյան» դաշինքի վերաբերմունքը Գյումրու և մեր քաղաքի բնակիչների հանդեպ: Ես պարզ ասեմ՝ խոսքը, օրինակ, կոմունալ ծառայություններին, աղբահանությանը, տրանսպորտին է վերաբերում: Եթե նման բան եղավ, դա մեր կողմից կգնահատվի վերաբերմունք գյումրեցիների հանդեպ: Բայց չեմ պատկերացնում, որ կլինի, որովհետև մինչև պաշտոնակատարի նշանակումը, ժամանակ է պետք, եթե քաղաքապետը հրաժարական է տալիս, փոխքաղաքապետներն էլ են դուրս գալիս, 20-25 օր քաղաքը անկառավարելի վիճակում է մնալու: Ներքին համոզմունք ունեմ, որ սիրում են իրենց քաղաքը և չեն թողնի, որ կենսական կարևորության օղակները չաշխատեն, համենայն դեպս գյումրեցին նման վերաբերմունքի արժանի չէ»,- նշեց Սարուխանյանը:
Եթե իրադարձությունները զարգանան այնպես, որ Սարուխանյանը դառնա Գյումրու քաղաքապետ, հաջողելո՞ւ է արդյոք այս պաշտոնում: Մեզ հետ զրույցում պատգամավորը շեշտեց՝ միանշանակ:
«Հաջողելու եմ, ծնունդով գյումրեցի եմ, այստեղ եմ մեծացել, դպրոց հաճախել, բարեկամներ, հարազատներ, ընկերներ ունեմ: Իմ սրտի քաղաքն է: Իմ ուսանողական տարիներին՝ ազատ օրերին, ես Երևանից Գյումրի եմ եկել, միանշանակ հաջողելու եմ»,- համոզմունք հայտնեց նա:
Ավելի վաղ հայտնել էինք, որ, «Հայկական ժամանակ»-ի տեղեկություններով, Գյումրու քաղաքապետ Վարդգես Սամսոնյանը հրաժարական է տվել: