Եվրոպական խորհրդարանի՝ «Ադրբեջանում իրավիճակի, մարդու իրավունքների ու միջազգային իրավունքի խախտումների եւ Հայաստանի հետ հարաբերությունների» վերաբերյալ բանաձևը ոչ միայն քաղաքական բանաձև է, այլև կարող է ծառայել որպես պատմական իրադարձությունները ճշգրտորեն նկարագող փաստաթուղթ:
Այս մասին Առաջին ալիքի եթերում ասաց ԱԺ Եվրոպական ինտեգրման հարցերի մշտական հանձնաժողովի նախագահ Արման Եղոյանը՝ անդրադառնալով Եվրոպական խորհրդարանի՝ Բաքվի դեմ նոր բանաձևին:
Ինչու են բանաձևում միավորվել Ադրբեջանում իրավիճակի, մարդու իրավունքների ու միջազգային իրավունքի խախտումները և Հայաստանի հետ հարաբերությունները՝ Պետրոս Ղազարյանի հարցին ի պատասխան, Եղոյանն ասաց միավորվել են, քանի որ ԵՄ-ն այդ 2 հատվածում էլ բարձրաձայնման արժանի խնդիրներ է տեսել:
«Նախ Ադրբեջանի ներքին խնդիրները, մարդու իրավուքի, ազատությունների վերաբերյալ առաջին անգամ չէ, որ բարձրաձայնվում է, և արդեն քանի տարի է դրանց ավելացել է Հայաստանի հետ հարաբերությունների հարցը, որովհետև ԵՄ-ի հետաքրքրությունը մեր տարածաշրջանով որոշակիորեն աճել է: Ըստ էության, այն վարքագիծը, որը դրսևորում է Ադրբեջանը, հակասության մեջ է մտնում ԵՄ հետաքրքրությունների և շահերի հետ»,- ասաց Արման Եղոյանը:
