«Հարգելի գործընկերներ, ես ուզում եմ հասկանալ այդ ժանրը»:
Այս մասին ԱԺ-ում՝ ՀՀ-ի ու Ադրբեջանի միջև սահմանազատման հանձնաժողովների Կանոնակարգի վավերացման հարցի քննարկման ժամանակ, ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ դիմելով ընդդիմությանը:
«Նման ժանր դեռ չկար, որ Մհեր Գրիգորյանը դեռ ելույթ չի ունեցել, դուք եկել եք ու հարց եք տալիս և ասում, որ չեք մասնակցում այդ քննարկմանը, այնինչ հարց եք տալիս: Լրիվ «Շլյոդինգերի» քննարկումն է՝ քվանտային տիրույթ եք մտել, միաժամանակ և՛ մասնակցում եք քննարկմանը, և՛ չեք մասնակցում: Ասեմ, որ իսկապես տիտանական ջանքեր էր պահանջվում, որպեսզի ընդդիմությունը հասներ այս մակարդակին: Ես չեմ հասկանում այս քայլի իմաստը, հո մենք դպրոցական չենք, կներեք, դուք 8 բ-ն ե՞ք, թե՞ խորհրդարանական խմբակցություն»,- ասաց Կոնջորյանը:
Ապա դիմելով «Հայաստան» խմբակցության պատգամավոր Արմեն Ռուստամյանին՝ Կոնջորյանը նկատեց. «Պարոն Ռուստամյան, երբ որ ասում եք, որ սա դեմ է մեր ազգային և պետական շահերին՝ խոսելով սահմանազատման Կանոնակարգի և ընդհանրապես սահմանազատման մասին, կներեք, ո՞ր պետության ազգային և պետական շահերը նկատի ունեք: Ես կարծում եմ, որ ՀՀ ազգային ու պետական և ՀՀ քաղաքացիների շահերից է բխում ունենալ սահմանազատված սահման, և այլ պետությունների շահերից կարող է և չբխվել, որ ՀՀ-ն ունենա սահմանազատված սահման, որովհետև, եթե ՀՀ-ն չունի սահմանազատված սահման, միշտ կարելի է այդ սահմանների վերաբերյալ ստեղծել ամենատարբեր էսկալացիաներ: Հիմա հարց է առաջանում՝ երբ ասում եք, որ սա չի բխում մեր ազգային և պետական շահերից, ո՞ր երկրի ազգային և պետական շահը նկատի ունեք»:
Առավել մանրամասն՝ տեսանյութում:
